Memleket basshysy zańǵa qol qoıdy: Máslıhatqa qandaı jańa ókilettik berildi
ASTANA.KAZINFORM – Prezıdent «Memlekettik basqarý jáne jergilikti ózin-ózi basqarý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zańǵa qol qoıdy.
Atap aıtqanda, zańnamaǵa máslıhat apparaty basshysynyń quzyretin aıqyndaıtyn jańa bap engizildi.
Onyń negizgi fýnktsııalary:
– máslıhat apparatynyń qyzmetine basshylyq etedi;
- óz quzyreti sheginde apparat qyzmetin uıymdastyrady, úılestiredi jáne baqylaıdy;
- máslıhat apparatynyń «B» korpýsynyń memlekettik ákimshilik qyzmetshilerin memlekettik laýazymdarǵa taǵaıyndaıdy jáne qyzmetten bosatady;
- máslıhat apparatynyń tártiptik jáne konkýrstyq komıssııalarynyń qyzmetine jalpy basshylyq jasaıdy;
- qyzmettik tártiptiń saqtalýyn baqylaıdy;
- máslıhat apparatynyń memlekettik qyzmetshilerin issaparǵa jiberý, eńbek demalysyn berý, materıaldyq kómek kórsetý, daıarlaý, qaıta daıarlaý jáne biliktiligin arttyrý, kótermeleý, ústemeaqylar belgileý máselelerin sheshedi;
- máslıhat apparatynyń memlekettik qyzmetshileriniń tártiptik jaýapkershiligi máselelerin qaraıdy;
- óz quzyreti sheginde Qazaqstan Respýblıkasynyń sybaılas jemqorlyqqa qarsy is-qımyl týraly zańnamasy talaptarynyń oryndalýyn qamtamasyz etedi;
- máslıhat sessııalaryn, turaqty jáne ýaqytsha komıssııalardyń otyrystaryn uıymdastyrady;
- máslıhat sheshimderiniń jobalaryn, máslıhat depýtattaryn issaparǵa jiberý týraly buıryqtardy jáne máslıhat tóraǵasy nemese turaqty komıssııa tóraǵasy bolmaǵan jaǵdaıda mindetterdi júkteý jónindegi qujattardy daıyndaıdy;
- depýtattardyń biliktiligin arttyrý is-sharalaryn uıymdastyrady;
- zańnamada jáne basqa da normatıvtik aktilerde kózdelgen ózge de ókilettikterdi júzege asyrady.
Sonymen qatar máslıhattarǵa mynadaı quqyqtar berildi:
- ákimderdiń halyqpen kezdesýleri barysynda kóterilgen problemalyq máselelerdi sheshý jónindegi is-qımyl josparlarynyń oryndalý nátıjelerin qaraý;
- bıýdjettik komıssııalardyń jumysyna qatysý;
- eldi mekenderdi sanıtarlyq tazartý qaǵıdalaryn bekitý;
- tekserý komıssııalarynyń tóraǵalary men múshelerine tártiptik jaza qoldaný.
Budan bólek, zań depýtattyq saýaldardy qaraý merzimin 30 kúnnen 15 kúnge deıin qysqartady jáne jergilikti qoǵamdastyq jınalystarynyń ókilettikterin keńeıtedi. Sondaı-aq qujatqa sáıkes, bir adam oblystyq, aýdandyq máslıhattyń, respýblıkalyq mańyzy bar qala nemese astana máslıhatynyń tóraǵasy laýazymyn qatarynan eki merzimnen artyq atqara almaıdy degen shekteý engizilgen edi.
Atalǵan zań bıyl 26 shildeden bastap kúshine enedi.
Sonymen qatar máslıhat depýtattaryna bıýdjetke túzetý engizý ýákiletin beretin zań jobasy maquldandy.
