Memleket basshysy jastardy keleshektiń kepili sanalatyn sapaly bilim alýǵa shaqyrdy
ASTANA. KAZINFORM — Qasym-Jomart Toqaev Shahmardan Esenov atyndaǵy Kaspıı tehnologııalar jáne ınjınırıng ýnıversıtetiniń aýmaǵynda ornalasqan tehnologııa parkiniń jumysymen tanysty. Bul týraly Aqordanyń baspasóz qyzmeti habarlady.
Prezıdentke tehnoparktiń zamanaýı ınfraqurylymmen jasaqtalǵany jóninde aıtyldy. Munyń bári startaptar men jobalar ázirleýmen aınalysatyn kásipkerlerdi, stýdentterdi, sondaı-aq oqýshylardy qoldaýǵa arnalǵan.
Memleket basshysyna ınnovatsııalyq zerthanalar men sheberhanalar tanystyryldy. Onda stýdentter men jas mamandar elektronıka, robotty tehnıka, lazermen kesý, aǵash jáne metall óńdeý, polıgrafııa, 3D-dızaın, tiginshilik daǵdylaryn meńgeredi.
Prezıdent halyqaralyq baǵdarlama boıynsha ІT-mamandardy daıarlaıtyn oqý aımaǵyn jáne tsıfrlyq ári telekommýnıkatsııalyq quzyretterdi damytýǵa baǵyttalǵan zerthanany aralap kórdi.
Qasym-Jomart Toqaev stýdenttermen áńgimelesý barysynda qazir jańa tehnologııalar men jasandy ıntellekt baǵyttaryn damytý ózekti bolyp otyrǵanyn jetkizdi. Prezıdenttiń aıtýynsha, elimizde kólik-logıstıka salasynyń bilikti mamandaryna suranys joǵary. Memleket basshysy jastardy keleshektiń kepili sanalatyn sapaly bilim alýǵa shaqyrdy.
Aıta ketelik Prezıdent Aqtaýdaǵy kóterme saýda-taratý ortalyǵyn aralap kórgen edi.