Memleket basshysy YDA Holding basqarma tóraǵasy Hýseın Arslandy qabyldady
ASTANA. KAZINFORM — Qasym-Jomart Toqaevqa YDA Holding kompanııasynyń Qazaqstanda iske asyrylyp jatqan ınvestıtsııalyq jobalary jóninde málimet berildi, dep habarlaıdy Aqordanyń baspasóz qyzmeti.
Atap aıtqanda, túrkııalyq holdıng Túrkistan, Astana jáne Petropavl qalalarynda kópbeıindi aýrýhanalar salý jáne paıdalaný boıynsha úsh jobany qolǵa alǵan.
Kompanııa aldaǵy ýaqytta Astanadaǵy YDA Industrial Park kópsalaly óndiris keshenin keńeıtip, sendvıch-panelder shyǵaratyn zaýyt salýdy bastaıdy.
Sonymen qatar Hýseın Arslan kompanııanyń Aqtaýda mýltımodaldi tranzıt habyn qurýǵa qatysty josparymen bólisti.
Memleket basshysy holdıngtiń Qazaqstanǵa strategııalyq turǵydan qyzyǵýshylyǵyn jáne elimizde júzege asyryp jatqan ınvestıtsııalyq bastamalaryn joǵary baǵalady.
Aıta keteıik, keshe Qazaqstan Prezıdenti Túrkııaǵa resmı saparmen bardy. Áýejaıda eki el prezıdentteri az-kem áńgimelesti.
Qazaqstan Prezıdentiniń kelýine oraı Ankara kósheleri arnaıy bannermen bezendirildi.
Búgin Toqaev Mustafa Kemal Atatúrik kesenesine zııarat etti.