Memleket basshysy ıAdrolyq synaqtarǵa qarsy halyqaralyq is-qımyl kúnine oraı úndeý jasady

- Búgin álem qaýymdastyǵy Qazaqstannyń bastamasymen Birikken Ulttar Uıymynyń Bas Assambleıasy bekitken ıAdrolyq synaqtarǵa qarsy halyqaralyq is-qımyl kúnin atap ótip jatyr. Osydan 35 jyl buryn halyqaralyq ahýal kúrdeli bolǵanyna qaramastan, Semeı ıadrolyq polıgony jabyldy. Ondaǵan jyl boıy jasalǵan jarylystar azamattarymyzdyń densaýlyǵyna jáne qorshaǵan ortaǵa orasan zor zardabyn tıgizip, halqymyzǵa orny tolmas qasiret ákeldi. Bul ıadrolyq synaqtardyń saldary kúlli adamzat balasy úshin asa aýyr bolǵanyn uǵyndyratyn, sondaı-aq álem jurtshylyǵyn mundaı alapat apatqa jol bermeýge shaqyratyn aıryqsha mańyzdy kún sanalady, - dedi Prezıdent

Qazaqstan dúnıe júzinde qýaty jaǵynan tórtinshi oryndaǵy ıadrolyq arsenaldan óz erkimen bas tartty. Elimiz beıbitshilik, qaýipsizdik jáne turaqty damý jolyn tańdap, tarıhı sheshim qabyldady. Sonyń arqasynda halqymyzdyń uzaq jyldar boıy ańsaǵan arman-tilegi oryndaldy.

- Bul qadam memleketimizdiń óskeleń urpaq aldyndaǵy tereń jaýapkershiligin pash etkeni sózsiz. Jańa Konstıtýtsııa preambýlasynda elimizdiń beıbitshilikke umtylyp, barlyq memleketpen dostyq qarym-qatynas ornatatyny aıqyn jazyldy. Osy ustanym syrtqy saıasatymyzdyń myzǵymas qaǵıdaty bolyp qala beredi. Halyqaralyq antııadrolyq qozǵalys kóshbasshylarynyń biri retinde elimizdiń ustanymy ózgermeıdi: biz ıadrolyq derjavalar arasynda kıkiljiń emes, kelissózder bolýyn qoldaımyz, ıAdrolyq synaqtarǵa jan-jaqty tyıym salý týraly sharttyń kúshine enýin tezdetýge jáne ıadrolyq qarýdy qoldanýǵa qatysty qaýip-qaterlerdi joıý úshin birlesip batyl qadamdar jasaýǵa shaqyramyz. Biz atom energııasyn jasampaz maqsatta ǵana paıdalanǵan jón dep sanaımyz. Halqymyz jalpyulttyq referendýmda ıadrolyq energetıkany damytýdyń strategııalyq baǵyt-baǵdaryn biraýyzdan qoldap, Qazaqstannyń ondaǵan jyldardy qamtıtyn ekonomıkalyq jáne ǵylymı-tehnıkalyq órleýiniń berik negizin qalady, - dedi Prezıdent.

Osy strategııalyq tańdaý aýqymdy ózgeristerge jol ashyp, memleketimizdiń turaqty ósip-órkendeýine aıryqsha serpin beretini anyq.

- Qazirgi tańda barlyq salada jasalyp jatqan túbegeıli reformalardyń maqsaty – bir. Biz Ádiletti, Ozyq jáne Taza Qazaqstandy quryp jatyrmyz. Bárimiz bir el bolyp, bıik maqsatymyzǵa jetemiz. Men buǵan kámil senemin, - dedi Qasym-Jomart Toqaev.

Aıta keteıik, 28 tamyzda burynǵy Semeı ıadrolyq synaq polıgonynyń aýmaǵynda Semeı ıadrolyq qaýipsizdik aımaǵynyń jergilikti jerde shekaralaryn belgileýdi aıaqtaıtyn sońǵy shekaralyq belgi ornatyldy.