Memleket basshysy Wilo Group kompanııalar tobynyń basqarma tóraǵasy Olıver Germesti qabyldady
ASTANA. KAZINFORM - Germanııaǵa resmı sapary aıasynda Qasym-Jomart Toqaev Wilo Group halyqaralyq tehnologııalyq kompanııalar tobynyń jetekshisi Olıver Germespen kezdesti, dep habarlaıdy Aqordanyń baspasóz qyzmeti.
Kontsern sorǵylar shyǵarady, sondaı-aq turǵyn úılerge, qoǵamdyq jáne óndiris ǵımarattaryna arnalǵan energııa únemdeýshi sheshimder usynady.
Prezıdent Wilo kompanııasyn Qazaqstanda jergilikti óndiristi damytqan nemis bıznesiniń jarqyn úlgisi dep atady. Qasym-Jomart Toqaev kompanııanyń Almaty oblysyndaǵy óndiris keshenine ınvestıtsııa salý, sondaı-aq elimizdi Ortalyq Azııa naryǵyna shyǵatyn alań retinde paıdalaný týraly sheshimin joǵary baǵalady.
Memleket basshysynyń pikirinshe, endigi qadam lokalızatsııany tereńdetý bolýǵa tıis. ıAǵnı, Qazaqstanda shyǵarylatyn bólshekter úlesin arttyrýǵa, ınjenerlik jáne servıstik áleýetti damytýǵa, otandyq jetkizýshiler qataryn kóbeıtýge mán bergen jón.
Bul rette Prezıdent kontsernniń Alataý qalasynda sorǵy qurylǵysyna mamandanǵan óńirlik servıs jáne ınjenerlik ortalyǵyn ashý josparyn quptady.
Qasym-Jomart Toqaevtyń aıtýynsha, elimiz Wilo kompanııasynyń otandyq ınjınırıng kásiporyndarymen, ýnıversıtettermen jáne tehnıkalyq mamandarmen yntymaqtastyǵyna múddeli. Onyń aıasynda kadr daıarlaý, servıstik qyzmet kórsetý jáne tsıfrlyq óndiristiń ozyq tájirıbesin engizý baǵyttaryn ilgeriletýge bolady.
Olıver Germes kontsern jobalaryna qoldaý kórsetkeni úshin Qazaqstan Prezıdentine alǵys aıtty, sondaı-aq elimizben seriktestik aıasyn keńeıtý josparyn tanystyrdy.
Nemis kásipkeri Qazaqstannyń Wilo úshin Ortalyq Azııadaǵy óńirlik habqa aınalǵanyn atap ótti.
