Memleket basshysy: Ulý jyly ultymyz úshin mańyzdy oqıǵalarǵa toly boldy

ASTANA. KAZINFORM – Prezıdent Qasym-Jomart Toqaev qazaqstandyqtardy Jańa jyl merekesimen quttyqtaı otyryp, el jetistikterin atap ótti.

- Ulý jyly ultymyz úshin mańyzdy oqıǵalarǵa toly boldy. Túrli saladaǵy reformalar jemisin bere bastady. Ekonomıkanyń jańa baǵdaryn belgilep, naqty sharalardy qolǵa aldyq. Óńdeý ónerkásibi qarqyndy damyp keledi. Birqatar iri óndiris orny ashyldy. Investıtsııalyq ahýal jaqsardy. Myńdaǵan shaqyrym jol salynyp, jóndeldi. Elimizdegi eń uzyn kópirdiń qurylysy aıaqtalyp, halyq ıgiligine berildi. Dıqandarymyz mol astyq jınap, qambany dánge toltyrdy, - dedi Memleket basshysy.

Sondaı-aq «Taza Qazaqstan» aktsııasynyń aıasynda qalalar men aýyldar jańasha kelbetke ıe bola bastaǵanyn aıtty. Alǵash ret azamattarymyzdyń ortasha ómir súrý uzaqtyǵy 75 jasqa jetkenin, Ulttyq qordaǵy qarjynyń bir bóligi balalardyń esepshotyna túskenin, elimizdiń keleshegi úshin óte mańyzdy sheshim qabyldanǵanyn atap ótti.

- Parlament depýtattary qoǵamdaǵy ózekti máseleler boıynsha zańdar qabyldady. Sondaı-aq, bıyl biz elimizdiń keleshegine aıryqsha áser etetin óte mańyzdy sheshim qabyldadyq. Atom elektr stantsııasyna qatysty referendým ótkizdik. Kópshilik bul bastamaǵa qoldaý bildirdi, - dedi Prezıdent.

Memleket basshysy Astanada bedeldi halyqaralyq uıymdardyń mańyzdy sammıtteri ótkenin de eske saldy. Dúnıejúzilik kóshpendiler oıyndaryna myńdaǵan sportshylar men meımandar kelip, baıraqty básekeni tabysty uıymdastyryp, tól órkenıetimizdi jer júzine tanytqanymyzdy atap ótti. El turǵyndarynyń tabıǵı apat kezindegi aýyrtpalyqty jumyla kótergenine toqtaldy.

- Bıyl kóktemde birqatar aımaqta alapat tasqyn bolǵanyn bilesizder. Tabıǵattyń tosyn synaǵy bárimizge aýyr tıgeni sózsiz. Soǵan qaramastan, qıyn kúnderde halqymyz bir-birine janashyr bolyp, myzǵymas birligin kórsetti. Zardap shekken barsha azamatqa jan-jaqty kómek berildi. Memleket eshkimdi nazardan tys qaldyrǵan joq. Barlyq mindettemesin tolyq oryndady. Júzdegen otbasy Jańa jyldy jańa shańyraqta qarsy alyp jatyr. Biz osylaısha yrysty yntymaǵymyzdyń arqasynda barlyq qıyndyqty eńseremiz. Alǵa senimmen qadam basamyz, - dedi Memleket basshysy.

Prezıdent quttyqtaýynyń tolyq mátinin myna silteme arqyly oqı alasyz.