Memleket basshysy Ulttyq qaýipsizdik komıtetiniń tóraǵasy Ermek Saǵymbaevty qabyldady
ASTANA. KAZINFORM — Ermek Saǵymbaev Ulttyq qaýipsizdik komıtetiniń jyl basynan beri atqarǵan jumysynyń nátıjeleri, vedomstvony reformalaý barysy jáne aldaǵy kezeńge arnalǵan mindetter týraly esep berdi.
Ol ulttyq qaýipsizdikke tónetin qazirgi syn-qaterler men qaýipterge baılanysty UQK qyzmetin jetildirý sharalary, sonyń ishinde normatıvtik-quqyqtyq bazany damytý, kadrlyq áleýetti nyǵaıtý, ozyq aqparattyq tehnologııalardy engizý jáne qyzmettik protsesterdi bıýrokratııadan aryltý jaıynda baıandady.
Sondaı-aq elimizde terrorıstik jáne ekstremıstik áreketterge jol bermeý jumystarynyń kúsheıtilgeni jóninde aıtty.
Jyl basynan beri UQK materıaldary boıynsha terrorızm men ekstremızmge qatysy bolǵany úshin 25 adam sottalǵan, sotqa deıingi tergeý amaldary aıasynda taǵy 13 adam ustalǵan.
Іshki ister mınıstrligimen birlesip, 6 qylmystyq toptyń áreketine tosqaýyl qoıylǵan jáne 35 adam tutqyndalǵan.
Zańsyz aınalymnan 148 qarý, qoldan jasalǵan 5 jarylǵysh qural, 32 granata jáne 4431 oq-dári tárkilengen.
esirtki bıznesine qarsy kúres aıasynda 16 operatsııa júrgizilgen. Esirtki tasymaldaıtyn 18 halyqaralyq jáne 9 óńirlik arna, sondaı-aq 10 esirtki zerthanasy joıylǵan.
800 keliden astam esirtki jáne psıhotroptyq zattar, 14 tonna hımııalyq reagentter men kóknár shıkizaty tárkilengen.
Ekonomıkalyq qaýipsizdikti qamtamasyz etý jáne sybaılas jemqorlyqqa qarsy is-qımyl sheńberinde memleketke 707 mıllıard teńgeden astam soma zalal keltirýge jol berilmegen jáne bıýdjetke 1,2 mıllıard teńge qaıtarylǵan.
Memlekettik shekarany buzǵan 7 myńnan astam adam ustalǵan.
Shekara arqyly qarý-jaraq pen oq-dári, esirtki jáne basqa da tyıym salynǵan zattardy tasymaldaýǵa qatysty 395 árekettiń joly kesilgen.
Sondaı-aq 3,2 mıllıard teńge kólemindegi valıýtany jáne quny 7,6 mıllıard teńge bolatyn taýarlardy zańsyz ótkizýge tosqaýyl qoıylǵan;
Memlekettik organdardyń aqparattyq júıelerine jasalǵan 50,3 mıllıon kıber jáne 819 DDoS-shabýylǵa toıtarys berilgeni týraly baıandady.
Prezıdent ulttyq qaýipsizdik organdarynyń qyzmet baǵyttaryna qatysty birqatar tapsyrma berdi.
