Memleket basshysy Ulttyq ǵylymı onkologııa ortalyǵynyń jańa korpýsyn aralap kórdi
ASTANA. KAZINFORM - Prezıdent Qasym-Jomart Toqaev Ulttyq ǵylymı onkologııa ortalyǵyndaǵy jańa korpýstyń qurylys barysymen tanysty. Nysan bıyl tamyz aıynda paıdalanýǵa beriledi, dep habarlaıdy Aqordanyń baspasóz qyzmeti.
Ǵımarattyń jalpy aýdany 58 myń sharshy metrden asady. Mundaǵy statsıonar 210 tósek-orynǵa eseptelgen. Onyń ishinde 24 oryn anestezıologııa, reanımatsııa jáne ıntensıvti terapııa bólimderine, 150 oryn kúndizgi statsıonarǵa arnalǵan. Josparǵa sáıkes bul aýrýhanada jyl saıyn 6 myń naýqas emdele alady.
Memleket basshysyna jańa korpýsta qaterli isikterdi dıagnostıka jasaýǵa jáne emdeýge qatysty álemdik biregeı tehnologııalar shoǵyrlanatyny jóninde málimet berildi. Munda ǵylymı zertteýler júrgizip, ǵylymı-tehnıkalyq baǵdarlamalar men bilim berý tájirıbelerin júzege asyrýǵa jaǵdaı jasalady.
Jańa korpýs ashylǵannan keıin bul ortalyq onkologııalyq kómek kórsetý boıynsha ıntegratsııalanǵan model qurý isinde ulttyq úılestirýshige aınalady. Atalǵan bastamada densaýlyq saqtaý júıesindegi alǵashqy býynnan bastap onkologııalyq aýrýlardy emdeýge mamandanǵan barlyq medıtsınalyq mekeme qamtylady.
Sonymen qatar statsıonarda bas jáne moıyn onkologııasy, torakaldy jáne abdomınaldy onkologııa, onkoýrologııa, mammologııa, onkogınekologııa, osteoonkologııa jáne onkogematologııa ortalyqtaryn ashý qarastyrylǵan.
Memleket basshysy ujym qyzmetkerlerimen kezdesý barysynda bul korpýsty salý densaýlyq saqtaý salasyndaǵy basym mindetterdi sapaly oryndaýǵa múmkindik beretinin atap ótti.
– Jańa medıtsınalyq mekeme qutty bolsyn. Álemde mundaı ortalyqtar óte az. Bul bizdiń aımaqtaǵy medıtsınalyq tájirıbe men ǵylymdy ushtastyratyn ozyq mekeme bolmaq, – dedi Qasym-Jomart Toqaev.
Sondaı-aq Prezıdent nysan qurylysynyń merzimi men joǵary sapa standarttaryn qatań saqtaý qajet ekenine nazar aýdardy.
