Prezıdent UǴA damytý strategııasy men jumys josparyn pysyqtaýdy tapsyrdy
ASTANA. KAZINFORM – Memleket basshysy Ulttyq ǵylym akademııasynyń prezıdenti Aqylbek Kúrishbaevty qabyldady. Kezdesý barysynda otandyq ǵylymdy damytý máseleleri talqylandy - dep habarlaıdy Aqorda.
Memleket basshysy byltyr jańa mártebe berilgen Ulttyq Ǵylym akademııasy otandyq ǵalymdardyń kúsh-jigerin biriktirip, ǵylym men ekonomıkaǵa naqty paıda ákeletin jańalyqtar engizýge erekshe mán berýge tıis ekenin atap ótti.
«Qasym-Jomart Toqaev Ulttyq ǵylym akademııasynyń jańa múshelerin saılaý protsesin jedeldetý, Akademııa jumysyna talantty jas ǵalymdar men jańa mamandardy keńinen tartý qajet ekenine nazar aýdardy», — delingen habarlamada.
Sonymen qatar Prezıdentke Aqylbek Kúrishbaev ózi basqaratyn Qazaq ulttyq agrarlyq zertteý ýnıversıtetiniń ǵylymı zertteýlerin jáne agroónerkásip salasyn jetildirýge baǵyttalǵan jumystaryn tanystyrdy.
Memleket basshysynyń pikirinshe, oqý ornyna zertteý ýnıversıteti mártebesiniń berilýi agrarlyq sektordaǵy ǵylymı ázirlemelerdi naqty óndiriske engizýge, ǵylymı zertteýlerdiń nátıjesin kommertsııalandyrýǵa múmkindik beredi.
«Kezdesý sońynda Qasym-Jomart Toqaev jańa mindetterdi eskere otyryp, Ulttyq ǵylym akademııasyn damytý strategııasy men jumys josparyn pysyqtaýdy tapsyrdy. Sonymen qatar Qazaqstan Ǵylym akademııasynyń negizin qalaǵan Qanysh Sátbaevtyń 125 jyldyǵyna arnalǵan is-sharalardy joǵary deńgeıde uıymdastyrý mańyzdy ekenin aıtty»,- dep jazylǵan.
