Memleket basshysy Ulttyq bankke qarjy júıesiniń ornyqtylyǵyn qamtamasyz etýdi tapsyrdy

Ulttyq bank tóraǵasy Tımýr Súleımenov aqsha-nesıe saıasatynda qol jetkizgen nátıjeler, qarjy sektory, altyn-valıýta rezervi, Ulttyq qor men BJZQ zeınetaqy aktıvteriniń jaǵdaıy, sondaı-aq qarjy júıesiniń tsıfrlyq transformatsııalanýy jóninde málimet berdi.

Prezıdentke byltyr ınflıatsııa deńgeıi 12,3 paıyzǵa deıin báseńdegeni baıandaldy. Inflıatsııanyń tómendeýi bıyl da jalǵasýda, mamyr aıynyń málimetine sáıkes — 10,4 paıyz.

Ulttyq bank Úkimetpen birge ınflıatsııa deńgeıin baıaýlatý baǵytynda keshendi jumys júrgizýde.

Memleket basshysyna Ulttyq banktiń senimgerlik basqarýyna berilgen Ulttyq qor men BJZQ aktıvteriniń jaı-kúıi jóninde aqparat usynyldy.

Ulttyq banktiń altyn-valıýta rezervi byltyr rekordtyq deńgeıge jetip, 65,4 mıllıard dollardy qurady. Ulttyq qordyń valıýtalyq aktıvteri 5,1 mıllıard dollarǵa ósip, 63,9 mıllıard dollarǵa jetti. BJZQ aktıvteriniń kólemi 2,7 trıllıon teńgege artyp, 25,1 trıllıon teńgege ulǵaıdy.

Qasym-Jomart Toqaevqa tsıfrlandyrý jáne tsıfrlyq jobalardy damytý jaıynda aıtyldy. 2025 jyly tsıfrlyq aktıvterge arnalǵan arnaıy quqyqtyq rejım qoldanysqa enip, onyń bazasynda naqty aktıvterdi tokendeý, aqshaǵa baılanǵan steıblkoınder shyǵarý, krıptoprovaıder men krıpto-fıat arnalaryn uıymdastyrý sııaqty 30-dan astam pılottyq joba júzege asyryldy.

Qazaqstan óńirdegi alǵashqy Ulttyq tsıfrlyq qarjy ınfraqurylymyn iske qosty. Bul qaýipsiz bıometrııa, bankaralyq esep aıyrysýlardy júrgizý, qarjylyq aqparat almasý júıesi, tsıfrlyq teńge, alaıaqtyqtan qorǵaý jáne zamanaýı tsıfrlyq servıster sekildi tetikterdi biriktiredi.

Kezdesý sońynda Memleket basshysy Ulttyq bankke qarjy júıesiniń ornyqtylyǵyn qamtamasyz etýdi, sondaı-aq Úkimetpen birlese ınflıatsııany tejeý jáne makroekonomıkalyq turaqtylyqty qoldaý jóninde úılesimdi saıasat júrgizýdi tapsyrdy.

Sonymen qatar qarjy naryǵyndaǵy ozyq tsıfrlyq ınfraqurylymdy odan ári damytýdyń mańyzy aıryqsha atap ótildi.