Memleket basshysy Ulytaý oblysynyń jańa ákimine birqatar tapsyrma berdi
ASTANA. KAZINFORM – Memleket basshysy Ulytaý oblysynyń ákimi Eset Baıkendi qabyldady. Bul týraly Aqorda habarlady.
Prezıdentke Ulytaý oblysynyń áleýmettik-ekonomıkalyq damý barysy jáne aldaǵy kezeńge arnalǵan josparlar jóninde baıandaldy.
Qasym-Jomart Toqaevqa óńirdegi ınfraqurylymdy damytý, ınvestıtsııa tartý, ónerkásip áleýetin kóterý, ınjenerlik jelilerdi jańǵyrtý jáne turǵyndarǵa sapaly áleýmettik qyzmet kórsetý jumystary týraly málimet berildi.
Sondaı-aq basym jobalardy júzege asyrý jóninde usynystar aıtyldy.
Kezdesý sońynda Memleket basshysy oblystyń ornyqty damýyn qamtamasyz etýge, óńirdiń ınvestıtsııalyq tartymdylyǵyn arttyrýǵa jáne azamattardyń turmys sapasyn jaqsartýǵa baǵyttalǵan birqatar tapsyrma berdi.
Aıta keteıik, Memleket basshysynyń Jarlyǵymen Eset Baıken bıyl 17 shildede Ulytaý oblysynyń ákimi laýazymyna taǵaıyndaldy.
