Memleket basshysy: Uly babalardy mereıtoı kezinde ǵana eske alý — durys emes
QYZYLORDA. KAZINFORM – Uly babalarymyzdyń ósıetterin olardyń mereıtoıy kezinde ǵana eske alý durys emes. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.
- Abaı ilimi bizdiń ulttyq biregeıligimizdiń, ulttyq bolmysymyzdyń ózegi bolýǵa tıis. Onyń oı-tolǵamdary qansha zaman ótse de ózekti bolyp qala beredi. Qazirgi «Adal azamat» tujyrymdamasy uly oıshyldyń «Tolyq adam» ıdeıasymen tyǵyz astasyp jatyr. Biz Abaıdyń «Qara sózderin» ıÝNESKO-nyń «Álem jady» derekti muralar tizimine engizýimiz kerek. Ál-Farabı, ıAsaýı ilimderi de ult rýhanııatynyń ustyny sanalady. Ashyǵyn aıtsaq, uly babalarymyzdyń ósıetterin olardyń mereıtoıy kezinde ǵana eske alamyz, - dedi Prezıdent.
Memleket basshysynyń paıymynsha, bul – durys emes.
- Sondyqtan Ál-Farabı, ıAsaýı jáne Abaı ilimderin jan-jaqty dáripteıtin ǵylymı jıyndardy turaqty ótkizip turýymyz qajet. Bul basqaǵa emes, eń aldymen ózimiz úshin kerek. Olardyń muralary – bizdiń rýhanı-fılosofııalyq bolmysymyzdyń tiregi. Elimizdiń gýmanıtarlyq ınstıtýttary uly oıshyldarymyzdyń ilimin júıeli túrde nasıhattaǵany jón. Basty mindet – halqymyzdyń baǵa jetpes qazynasy – ulttyq murasyn saqtap, urpaqqa tabystaý, - dedi Qasym-Jomart Toqaev.
Prezıdent osy rette keıbir quryltaı músheleriniń fılosofııa, áleýmettaný, saıasattaný sııaqty ǵylymdardy damytý jáne qoǵamdyq-saıası oı-pikirler kóptomdyǵyn ázirleý týraly usynysyn atap ótti.
- Sondaı-aq olar ǵylymı mekemelerdiń zertteýleri onlaın platforma arqyly bárine birdeı qoljetimdi bolýy kerek ekenin aıtty. Jýyrda Astana men Almatyda prezıdenttik kitaphanalardyń qurylysy bastalady. Menińshe, bul nysandar tek kitaptar jınalǵan jer emes, qazaqtyń tarıhyn, mádenıeti men órkenıetin dáripteıtin ortalyqtar bolýy kerek, - dedi Memleket basshysy.
Budan buryn Memleket basshysy Qyzylordanyń damý qarqynyna jaqsy baǵa bergeni belgili boldy.
Aıta keteıik, V Ulttyq quryltaıdyń alǵashqy kúninde 200-den astam usynys aıtyldy.