Memleket basshysy Úkimet jumysyna baǵa berdi
ASTANA. KAZINFORM – AES boıynsha referendýmda daýys bergennen keıin BAQ ókilderine shaǵyn suhbat bergen Memleket basshysy Qasym-Jomart Toqaev el Úkimetiniń jumysyn baǵalady.
«Qazaqstan Úkimeti qazirgi quramda týra 7 aı jumys istedi. Referendýmnan keıin onyń quramy ózgeredi degen boljamdar aıtylyp júr. Úkimettiń jumysyna kóńilińiz tola ma?» - dep surady Kazinform tilshisi Prezıdentten.
«Menińshe, Úkimet tyrysyp, belsendi jumys istep jatyr. Memleket basshysy retinde men júktegen tapsyrmalardy oryndap keledi. BAQ-ta kórine bermeýi múmkin, bizdegi jumys óte qaýyrt. Óıtkeni, aqparattardy alyp otyramyn. Jalpy, men oqıtyn adammyn. Sondyqtan barlyq oqıǵadan únemi habardarmyn. Mınıstrlerdiń, Úkimet basshylyǵynyń jumysyndaǵy kemshilikterdi aıtyp otyramyn. Biraq, 7 aı – qysqa ǵana merzim. Úkimet músheleri ózderin kórsetýi tıis. Basty mindet – elimizdiń ekonomıkalyq ósim kózderin izdeý», - dep jaýap berdi Memleket basshysy.
Eske sala keteıik, buǵan deıin Memleket basshysy Qasym-Jomart Toqaevtyń elimizde atom elektr stansasyn salý boıynsha referendýmda daýys bergenin jazǵan edik.
