Memleket basshysy Túrkistan oblysynyń ákimi Nuralhan Kósherovti qabyldady
ASTANA. KAZINFORM — Memleket basshysyna Túrkistan oblysynyń áleýmettik-ekonomıkalyq damýy men aldaǵy kezeńge arnalǵan jospary baıandaldy. Bul týraly Aqorda málim etti.
Nuralhan Kósherovtiń aıtýynsha, óńirdiń ekonomıkalyq ósimi 113,9 paıyzdy qurady. Memlekettik bıýdjetke túsetin salyq túsimderi 1 trıllıon teńgege ósti. 2025 jyly aımaqqa 1,7 trıllıon teńge ınvestıtsııa, sonyń ishinde 1,4 trıllıon teńge jeke ınvestıtsııa tartyldy. Tikeleı sheteldik ınvestıtsııa kólemi 1,4 mıllıard dollarǵa jetti.
Prezıdentke byltyr jalpy quny 340 mıllıard teńgeni quraıtyn 58 ınvestıtsııalyq joba iske qosylyp, 8 myńnan astam jańa jumys orny ashylǵany aıtyldy.
Búginde oblysta 21 ındýstrıaldyq aımaq jumys isteıdi. «Turan» arnaıy ekonomıkalyq aımaǵynda 26 joba júzege asyrylýda, olardyń quny — 315 mıllıard teńge.
Aýyl sharýashylyǵynda maqta-toqyma, júgeri jáne et óndirisi klasterleri damyp keledi. Bul jobalar tolyǵymen iske qosylǵanda 2027 jylǵa qaraı aýyl sharýashylyǵy ónimderiniń kólemi qosymsha 479,5 mıllıard teńgege artady dep josparlanyp otyr.
— Prezıdentke sońǵy úsh jylda ataýly áleýmettik kómek alýshylar sany eki esege qysqarǵany jóninde málimet berildi. Eńbekpen qamtý sharalaryna 148 myń adam tartylyp, jumyssyzdyq deńgeıi 4,6 paıyzdy qurady, — delingen habarlamada.
Oblys ákimi bilim berý, densaýlyq saqtaý, mádenıet nysandaryn salý, jol ınfraqurylymyn damytý, gazdandyrý jáne eldi mekenderdi aýyz sýmen qamtamasyz etý salalarynda atqarylǵan jumystarǵa toqtaldy.
Kezdesý sońynda Qasym-Jomart Toqaev ınvestıtsııa tartý, aýyl sharýashylyǵy men óndiristi órkendetý baǵytyndaǵy jumysty jalǵastyrýdy tapsyrdy. Sonymen qatar halyqtyń turmys sapasyn arttyrý, jańa jumys oryndaryn ashý jáne ınfraqurylymdy damytý máselelerine erekshe nazar aýdarý qajet ekenin atap ótti.
Buǵan deıin Prezıdent Densaýlyq saqtaý mınıstri Aqmaral Álnazarovany qabyldap, otandyq farmatsevtıka ónerkásibin órkendetý boıynsha birqatar tapsyrma bergen bolatyn.
