Memleket basshysy Túrikmenstan Prezıdentin «Altyn Qyran» ordenimen marapattady
ASTANA. KAZINFORM – Saltanatty rásimde Qasym-Jomart Toqaev Serdar Berdimuhamedovtiń jańa turpattaǵy bedeldi saıası qaıratker, Túrikmenstannyń memlekettiligin, áleýmettik-ekonomıkalyq áleýeti men halyqaralyq arenadaǵy ornyn dáıekti túrde nyǵaıtyp kele jatqan progressıvti, myqty kóshbasshy retindegi rólin atap ótti.
– Siz túrikmen halqynyń Ult kóshbasshysy, asa qurmetti Gýrbangýly Mıalıkgýlyevıch Berdimuhamedovtiń keleshekke arnalǵan strategııalyq baǵdaryn senimdi túrde jalǵastyryp kelesiz. Sizdiń salıqaly basshylyǵyńyzben Túrikmenstan ekonomıkasy keremet qarqynmen damýda. Elińizde ónerkásip, kólik ınfraqurylymy belsendi túrde jańǵyryp jatyr. Energetıkalyq áleýetti nyǵaıtý jáne tehnologııalyq transformatsııa baǵytynda aýqymdy jumys atqarylýda. Baıandy bastamalaryńyzdyń arqasynda baýyrlas Túrikmenstanda iri áleýmettik jobalar josparly túrde júzege asyrylyp, ǵylym-bilim salasy sony serpin alyp, halyqtyń ál-aýqaty jaqsara tústi. Bul jetistiktiń bári shynaıy qurmetke jáne joǵary baǵaǵa laıyq, – dedi Prezıdent.
Memleket basshysy Ashhabadtyń dıplomatııa, beıbitshilik pen turaqtylyq mekeni retindegi halyqaralyq bedeli men mártebesin arttyrý jolyndaǵy Túrikmenstan basshylyǵynyń kúsh-jigerine erekshe toqtaldy.
Qasym-Jomart Toqaevtyń aıtýynsha, Túrikmenstannyń 2025 jyldy Halyqaralyq beıbitshilik jáne senim jyly dep jarııalaý týraly bastamasyn BUU Bas Assambleıasynyń qoldaýy eldiń jaýapty ári belsendi ustanymyn kórsetedi.
Memleket basshysy Túrikmenstan Prezıdentiniń baýyrlas elder arasyndaǵy dostyqty, ózara túsinistik pen strategııalyq seriktestikti nyǵaıtýǵa qosqan úlesine joǵary baǵa berdi.
– Qazaq-túrikmen qarym-qatynasynyń keleshegi jarqyn ekenine senimdimin. Búgingi kelissózder qorytyndysy osyǵan aıqyn dálel. Qol jetkizilgen ýaǵdalastyqtardyń tabysty júzege asyrylýy kóp josparly seriktestigimizge tyń serpin berip, qazaq-túrikmen yntymaqtastyǵynyń jylnamasyndaǵy jańa kezeńge jol ashatynyna kúmán joq, – dedi Memleket basshysy.
Serdar Berdimuhamedov Qazaqstannyń eń joǵary memlekettik nagradasy – «Altyn Qyran» ordenimen marapattaǵany úshin Qasym-Jomart Toqaevqa jáne qazaqstandyqtarǵa alǵys aıtty.
– Bul marapatty Túrikmenstan halqyna kórsetken qurmetińiz, elderimiz arasynda ǵasyrlardan jalǵasyp kele jatqan berik dostyq pen tatý kórshiliktiń belgisi retinde qabyldaımyn. Eki memleket halyqaralyq arenada tyǵyz ári nátıjeli yqpaldastyq ornatqan. Yntymaqtastyǵymyz óńirlik jáne jahandyq kún tártibindegi ózekti máselelerdi sheshýde ózara túsinistiktiń, birliktiń jáne qoldaýdyń joǵary deńgeıin kórsetip keledi, – dedi Túrikmenstan Prezıdenti.
Aıta keteıik, buǵan deıin Memleket basshysy Túrikmenstan Prezıdentimen kelissóz júrgizgeni habarlandy.