Memleket basshysy Túrikmenstan Prezıdentimen kezdesý ótkizdi
ASTANA. KAZINFORM – Qasym-Jomart Toqaev Túrikmenstanǵa jumys sapary aıasynda Serdar Berdimuhamedovpen kezdesti. Bul týraly Aqorda habarlady.
Memleket basshysy yqylaspen qarsy alyp, qonaqjaılyq tanytqany úshin Túrikmenstan Prezıdentine alǵys aıtty. Sondaı-aq dostyqqa, tatý kórshilikke jáne ózara qoldaýǵa negizdelgen qazaq-túrikmen qarym-qatynasynyń joǵary deńgeıde ekenin atap ótti.
Kezdesýde taraptar yqpaldastyqtyń barlyq baǵytynda oń dınamıka baıqalatynyna toqtaldy.
Memleketter basshylary buǵan deıin qol jetkizilgen ýaǵdalastyqtardy, sondaı-aq energetıka, ónerkásip, aýyl sharýashylyǵy, kólik jáne basqa da salalardaǵy birlesken perspektıvti jobalardy júzege asyrý barysyn talqylady.
Budan bólek, mádenı-gýmanıtarlyq baılanystardy keńeıtýge basa nazar aýdaryldy.
Sonymen qatar aldaǵy birlesken is-sharalar kestesi qarastyryldy.
Aıta keteıik, Prezıdent Ortalyq Azııa jáne Ázerbaıjan memleketteri basshylarynyń VIIІ Konsýltatıvtik kezdesýine qatysty.
