Memleket basshysy Túrikmenstan Prezıdentimen kezdesý ótkizdi
AShHABAD. KAZINFORM — Qasym-Jomart Toqaev Serdar Berdimuhamedov jáne baýyrlas túrikmen halqyn aıtýly data –Túrikmenstannyń turaqty beıtaraptyǵyna 30 jyl tolýymen quttyqtady. Memleket basshysy mereıli sátke oraı uıymdastyrylǵan halyqaralyq forýmda kóteriletin máselelerdiń mańyzyn atap ótti. Bul týraly Aqorda málim etti.
– Ashhabad sekildi kórkem shaharǵa shaqyrǵanyńyz úshin rızashylyǵymdy bildiremin. Munda kelgen saıyn qonaqjaı peıilderińizdi, týystyq ári dostyq kóńilderińizdi sezinemiz. Erteńgi forým ózine júktelgen mindetti tolyq atqaryp shyǵatynyna jáne halyqaralyq qatynastar tarıhynda aıtýly ýaqıǵa bolatynyna senimdimin. Óıtkeni bul jıynda beıbitshilik, beıtaraptylyq jáne senim sekildi eń ózekti taqyryptar qozǵalady. Qazirgi álemge jetpeı turǵany da osy qundylyqtar, – dedi Qasym-Jomart Toqaev.
Taraptar ekijaqty qarym-qatynasty damytý perspektıvasyn talqylady. Serdar Berdimuhamedovtiń taıaýda Astanaǵa jasaǵan memlekettik sapary kezinde qol jetkizilgen ýaǵdalastyqtardy júzege asyrý barysyna aıryqsha mán berildi. Túrikmenstan PrezıdentiMemleket basshysymen Ashhabad qalasynda júzdeskenine qýanyshty ekenin jetkizdi.
– Osy halyqaralyq deńgeıdegi forýmǵa qatysý arqyly Siz beıbitshilikti, senim men ózara túsinistikti nyǵaıtýǵa beıil ekenińizdi kórsetip otyrsyz. Halyqaralyq beıbitshilik jáne senim forýmyna shaqyrýymdy qabyl alǵanyńyz úshin Sizge alǵys aıtamyn. Ózińizben túrikmen jerinde kezdesý biz úshin zor mártebe, – dedi Serdar Berdimuhamedov.
Memleketter basshylary ózara saýda kólemin arttyrý, ekonomıkalyq baılanystardy kúsheıtý, energetıka, kólik-logıstıka jáne aýyl sharýashylyǵy salalarynda birlesken jobalardy júzege asyrý máselelerin qarastyrdy.
Eske sala keteıik, búgin Prezıdent Túrikmenstannyń astanasy Ashhabad qalasyna bardy.