Memleket basshysy Túrikmenstan Prezıdentimen kelissóz júrgizdi

 ASTANA. KAZINFORM – Qasym-Jomart Toqaev Túrikmenstan Prezıdentimen kelissóz júrgizdi. Bul týraly Aqordanyń baspasóz qyzmeti habarlady.

Prezıdent elimiz Túrikmenstandy strategııalyq seriktes, baýyrlas memleket, eń jaqyn shekaralas kórshi sanaıtynyn atap ótti.

– Qurmetti Prezıdent Serdar Gýrbangýlyevıch, Qazaqstan Respýblıkasyna memlekettik saparmen qosh keldińiz! Elimiz Túrikmenstandy strategııalyq seriktes, baýyrlas memleket, eń jaqyn shekaralas kórshi sanaıdy. Bizdi ǵasyrlardan jalǵasyp kele jatqan dostyq, ortaq tarıh, til men mádenıet biriktiredi. Memleketterimiz arasyndaǵy saýda-sattyq, ekonomıkalyq yqpaldastyqtyń basqa da túrleri jáne mádenı-gýmanıtarlyq baılanystar qarqyndy damyp keledi. Eki el seriktestiginiń aýqymy men sapasyna kóńilimiz tolady dep aıtýǵa negiz bar. Bul yntymaqtastyq strategııalyq sıpatqa ıe. Degenmen alǵa qadam basý qajet. Kún tártibinde óte mańyzdy máseleler tur. Búgin olardyń sheshimin birlesip tabamyz dep oılaımyn, – dedi Qazaqstan Prezıdenti.

Serdar Berdimuhamedov qonaqjaılyq pen syı-qurmet úshin alǵys bildirdi.

– Qurmetti Qasym-Jomart Kemeluly, eń aldymen, Qazaqstan Respýblıkasyna memlekettik saparmen kelýge shaqyrǵanyńyzǵa rızashylyq bildiremin. Qazaq jerinde kórsetken qonaqjaılyǵyńyz ben syı-qurmetińiz úshin Ózimniń jáne delegatsııa atynan alǵys aıtamyn. Sondaı-aq Sizge túrikmen halqynyń Ult kóshbasshysy, qurmetti Gýrbangýly Mıalıkgýlyevıch Berdimuhamedovtiń sálemi men izgi tilegin jetkizýge ruqsat etińiz. Búginde Túrikmenstan men Qazaqstannyń qarym-qatynasy dostyq, baýyrlastyq jáne tatý kórshilik qaǵıdattary negizinde damyp keledi. Ózara yqpaldastyǵymyz saıası-dıplomatııalyq, saýda-ekonomıkalyq jáne mádenı-gýmanıtarlyq salalardy qamtıdy, – dedi Túrikmenstan Prezıdenti.

Qasym-Jomart Toqaev Túrikmenstan Prezıdentin Aqordada qarsy alǵanyn jazǵan bolatynbyz.