Memleket basshysy Túrkııa Prezıdentine quttyqtaý jedelhatyn joldady

ASTANA. KAZINFORM - Qasym-Jomart Toqaev Rejep Taııp Erdoǵandy jáne baýyrlas túrik halqyn Túrkııanyń ulttyq meıramy – Respýblıka kúnimen quttyqtady, dep habarlaıdy Aqordanyń baspasóz qyzmeti.

Prezıdent bıyl Túrkııaǵa jasaǵan resmı sapary aıasynda Rejep Taııp Erdoǵanmen mazmundy kelissózder júrgizgenin atap ótip, Ankarada qol jetkizilgen ýaǵdalastyqtar men mańyzdy bastamalar eki el arasyndaǵy strategııalyq seriktestikti odan ári nyǵaıtýǵa zor serpin beretinine senim bildirdi.

Qasym-Jomart Toqaev Rejep Taııp Erdoǵannyń jaýapty qyzmetine tolaǵaı tabys, al baýyrlas Túrkııa halqyna qut-bereke tiledi.

Osyǵan deıin Qasym-Jomart Toqaev Petr Paveldi Cheh Respýblıkasynyń Táýelsizdik kúnimen quttyqtaǵan bolatyn.