Memleket basshysy Túrkııa Prezıdentine kóńil aıtý jedelhatyn joldady
ASTANA. KAZINFORM — Qasym-Jomart Toqaev jedelhatta Bolý provıntsııasynda ornalasqan Kartalkaıa taý shańǵysy ortalyǵynda bolǵan órt saldarynan kóptegen adamnyń qaza tapqany týraly sýyt habardy tereń kúızelispen qabyldaǵanyn jetkizdi. Bul týraly Aqorda málim etti.
Sonymen qatar Memleket basshysy Qazaqstan halqynyń jáne óziniń atynan Túrkııa Prezıdenti Rejep Taııp Erdoǵan men jaqyndarynan aıyrylǵan otbasylarǵa, sondaı-aq baýyrlas túrik halqyna kóńil aıtyp, zardap shekkenderdiń tez arada saýyǵyp ketýine tilektestik bildirdi.
Aıta keteıik, Túrkııanyń taý shańǵy kýrortyndaǵy órtten qaza tapqandar sany 76-ǵa jetti.
Eske salaıyq, Túrkııanyń Bolýdaǵy Kartalkaıa taý shańǵysy kýrortyndaǵy órtke baılanysty aýyr qaıǵyny bastan keshýde. Órt qurbandarynyń kóp bolýyna baılanysty 22 qańtar elde jalpyulttyq aza tutý kúni bolyp jarııalandy.
Búgin QR SІM Túrkııanyń shańǵy kýrortyndaǵy órtten qazaqstandyqtar zardap shekpegeni jóninde aqparat berdi.