Memleket basshysy Túrkııa Prezıdentimen shaǵyn quramda kelissóz júrgizdi
Qazaqstan Prezıdenti Túrkııa basshysyna iltıpat kórsetti.
– Joǵary mártebeli Prezıdent myrza, qadirli baýyrym, Ózińizben Qazaqstannyń elordasynda júzdeskenime óte qýanyshtymyn. Eń aldymen, meniń shaqyrýymdy qabyl alyp, Qazaqstanǵa memlekettik saparmen kelgenińiz úshin shyn júrekten rızashylyǵymdy bildirgim keledi. Saparyńyzdyń mán-maǵynasy erekshe, óte joǵary dep aıtsaq artyq bolmaıdy. Sebebi bul, shyn máninde, tarıhı oqıǵa. Bul sapar elderimizdiń yntymaqtastyǵyna úlken serpin beretinine eshqandaı kúmán joq. Eki el arasynda tek qana dostyq, baýyrlastyq, máńgilik seriktestik qarym-qatynas qalyptasqan. Aramyzda eshqandaı túıtkil nemese sheshilmegen másele joq. Qosh keldińiz! – dedi Qasym-Jomart Toqaev.
Osy oraıda, Memleket basshysy byltyr Ankaraǵa jasaǵan resmı saparyn yqylaspen eske aldy.
– Biz Ankarada Strategııalyq yntymaqtastyq jónindegi komıssııanyń besinshi otyrysyn ótkizdik. Óte mańyzdy sheshimderge qol jetkizdik. Búgin Keńestiń altynshy otyrysy bolady. Aýqymdy bıznes forým ótedi. Ózińizben birge Astanaǵa úlken delegatsııa keldi. Sondyqtan saparyńyz oıdaǵydaı ótedi dep oılaımyz. Osylaısha, ózara yntymaqtastyǵymyzdyń jarqyn bolashaǵyna zor qadam jasaımyz, – dedi Qazaqstan Prezıdenti.
Rejep Taııp Erdoǵan baýyrlas qazaq eliniń kórsetken qurmetine alǵys aıtty.
– Eń áýeli, baýyrymyzdyń atajurtqa arnaıy shaqyrǵanyna rızashylyǵymdy bildirgim keledi. Bizge aıryqsha qonaqjaılyq tanytyp otyrsyzdar. Qazaq eliniń shekarasynan ótkennen qaptaldasa ushqan ushaqtarmen qarsy alyp, meniń delegatsııama úlken qurmet kórsettińizder. Bul bizdi erekshe qýantty. Árıne, muny umytpaımyz. Búgingi sapar baýyrlas halyqtardyń yntymaǵyn arttyrýǵa zor septigin tıgizedi dep senemin, – dedi Túrkııa Prezıdenti.
Aıta keteıik, Qazaqstan men Túrkııa máńgilik dostyq jáne keńeıtilgen strategııalyq seriktestik týraly deklaratsııa qabyldaıdy.
