Memleket basshysy Túrki órkenıeti ortalyǵyn qurý týraly sheshim qabyldady
ASTANA.KAZINFORM – Túrkistanda Túrki órkenıeti ortalyǵy qurylady. Bul týraly Túrki memleketteri uıymynyń beıresmı sammıtinde Prezıdent Qasym-Jomart Toqaev málim etti.
- Túrki memleketteriniń tarıhı jáne mádenı murasyn saqtaý jáne ony bolashaq urpaqqa amanat etip qaldyrý – barshamyzǵa ortaq mindet, paryz dep aıtýǵa bolady. Sol sebepti men Túrkistan qalasynyń rýhanııatymyzdaǵy rólin eskerip, osynda Túrki órkenıeti ortalyǵyn qurý týraly sheshim qabyldadym. Bul ortalyq baýyrlas elderdiń birlesip ǵylymı zertteý júrgizýine, mádenı jobalardy jáne bilim berý baǵdarlamalaryn iske asyrýyna jaǵdaı jasaıdy, sondaı-aq gýmanıtarlyq yqpaldastyǵymyzdy nyǵaıta túsedi, - dedi Qasym-Jomart Toqaev.
Prezıdenttiń aıtýynsha, ortalyqtyń qyzmetin tıimdi uıymdastyrý úshin Qoja Ahmet ıAsaýı atyndaǵy halyqaralyq qazaq-túrik ýnıversıtetiniń ǵylymı-akademııalyq áleýeti paıdalanylmaq.
- Bul ýnıversıtetke qajetti qarjylaı jáne basqa da járdem kórsetiledi. Bárimiz de jańa ǵana Túrki órkenıeti ortalyǵynyń irgetasyn qalaý rásimine kýá boldyq. Osy bastamaǵa kórsetken qoldaýlaryńyz úshin sizderge alǵysymyz zor, - dedi Memleket basshysy.
Budan buryn habarlanǵandaı, Búgin Túrkistan qalasynda Prezıdent Qasym-Jomart Toqaevtyń qatysýymen Túrki memleketteri uıymynyń beıresmı sammıti bastaldy. Sammıtke TMU-ǵa múshe memleketterdiń basshylary - Túrkııa prezıdenti Rejep Taııp Erdoǵan, Ózbekstan prezıdenti Shavkat Mırzıeev pen Qyrǵyzstan prezıdenti Sadyr Japarov, Ázerbaıjan prezıdenti Ilham Álıev keldi.
Jasandy ıntellekt jáne tsıfrlyq damý» taqyrybyna arnalǵan jıyn Qazaqstannyń tóraǵalyǵymen uıymdastyrylyp otyr.
