Memleket basshysy sammıtte Túrki álemin zertteýshiler klýbyn qurý týraly aıtty

ASTANA. KAZINFORM – Memleket basshysy Uıymǵa múshe elder arasynda mádenı-gýmanıtarlyq baılanys ta nyǵaıyp kele jatqanyn tilge tıek etti. Bul týraly Aqordanyń baspasóz qyzmeti habarlady. 

– Bıyl Aqtaý qalasy Túrki áleminiń mádenı astanasy bolyp jarııalandy. Sonyń aıasynda birqatar is-shara uıymdastyryldy. Kaspıı jaǵalaýynda túrki mádenıetiniń festıvali ótti. Osy mańyzdy is-sharaǵa 100 myńnan astam kórermen qatysty. Buǵan qosa, bıyl Almaty qalasy Túrki álemi jastarynyń astanasy atandy.

Biz óskeleń urpaqty baýyrlastyq rýhynda tárbıelep, jastarymyzdyń mádenı yqpaldastyǵyn nyǵaıtýdy qolǵa alýymyz qajet. Osyǵan oraı, kelesi jyly Almatyda Kreatıvti ekonomıka forýmyn ótkizýdi usynamyz. Mundaı qadam jastarymyzdy jaqyndastyrýǵa, olardyń bilimin jáne biligin arttyrýǵa múmkindik beredi. Qazaqta «Ónerli órge júzedi» degen sóz bar. Shyn máninde, óner, bilim, ǵylym qundylyqtary órkenıetimizdiń órisin keńeıtýge yqpal etedi.

Qazaqstanda elderimizdiń zııaly qaýym ókilderiniń basyn qosyp, arnaıy is-shara ótkizgen oryndy bolar edi. Bul is-sharany Uıymymyzdyń Aqsaqaldar keńesiniń aıasynda ótkizýge bolady. Onyń ústine, Túrki álemin zertteýshiler klýbyn qurýdy usynamyz. Ony Túrki Akademııasynyń negizinde qalyptastyrýǵa bolady, - dedi Qasym-Jomart Toqaev. 

Memleket basshysy Uıymǵa tóraǵalyq etetin Ázerbaıjan prezıdenti Ilham Álıevke tabys pen sáttilik tiledi. 

Buǵan deıin Prezıdent Qazaqstan «Túrki memleketteri uıymy+» formatyn qurý ıdeıasyn qoldaıtynyn aıtqan bolatyn. Sondaı-aq Qasym-Jomart Toqaev Túrki memleketteri uıymynyń HІІ sammıtinde sóz sóılep, uıym aıasynda Kıberqaýipsizdik keńesin qurýdy usyndy.