Memleket basshysy turǵyn úı saıasatyn reformalaýǵa qatysty zańǵa qol qoıdy
ASTANA. KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Zań azamattardyń, qandastardyń turǵyn úı jaǵdaılaryn jaqsartýǵa qatysty memlekettik qoldaý tetikterin jetildirýge baǵyttalǵan.
Túzetýlerdiń birinshi blogy Memleket basshysynyń tapsyrmasyna sáıkes, Otbasy bankiniń negizinde turǵyn úı kezegine qoıýdy, esepke alýdy jáne bólýdi bir ortalyqtan júzege asyratyn keshendi damý jáne qoldaý ınstıtýtyn qurýdy kózdeıdi.
Sonymen qatar Otbasy banki jeke turǵyn úı qorynan jalǵa alynǵan turǵyn úı úshin jaldaý aqysynyń bir bóligin sýbsıdııalaýdy, jeńildetilgen ıpotekalyq turǵyn úı qaryzdaryn berýdi jalǵastyrady.
Otbasy bank turǵyn úıdi bólý kezinde baspanaǵa muqtaj azamattardy esepke qoıý kúni men tabys deńgeıin eskeredi. Bul, birinshi kezekte, turǵyn úı kezeginde uzaq ýaqyttan beri turǵan adamdardy baspanamen qamtýǵa múmkindik beredi.
Túzetýlerdiń ekinshi blogynda turǵyn úıge muqtaj adamdar úshin qosymsha kepildikter engizý qarastyrylǵan.
Túzetýlerdiń úshinshi blogy memlekettik qoldaý sharalary aıasynda berilgen turǵyn úıdi ıelený jáne paıdalaný tetigin reglamentteıtin erejelerdi tolyqtyryp, naqtylaıdy.
Túzetýlerdiń tórtinshi blogy jer zańnamasynyń jekelegen erejelerin, qurylys, jeke tulǵalardyń depozıtterine kepildik berý salasyndaǵy zańnamalardy jetildirýge baǵyttalǵan.
Zańnyń mátini baspasózde jarııalanady.
Osyǵan deıin Memleket basshysy sot júıesin reformalaýǵa qatysty zańǵa qol qoıǵany týraly jazdyq.
