Memleket basshysy temirjol salasynyń ardagerlerimen kezdesti
ASTANA. KAZINFORM — Prezıdent Qasym-Jomart Toqaev «Qazaqstan temir joly» ulttyq kompanııasynyń ınnovatsııalyq bastamalarymen tanysqannan keıin, temirjol salasynyń ardagerlerimen júzdesti.
Olardyń qatarynda Qaltaı Sámbetov, Borıs Esenamanov, Marat Hamzın, Bolatbek Dúısemálıev, Qýanysh Kotyrev, Eskendir Rahmetjanov, Orazǵalı Ahmetbaev sııaqty qurmetti temirjolshylar boldy.
Memleket basshysy atalǵan salada uzaq jyl eńbek etken tájirıbeli mamandarmen temirjoldyń damý perspektıvasy jóninde pikir almasty.
— Jol — tirshilik kózi. Temirjol bolmasa, ekonomıka damymaıdy. Men temirjol salasyn órkendetýge basa mán beremin. Búgin Sıan qalasynda jańa qurǵaq porttyń ashylýyna baılanysty mańyzdy shara ótti. Shyn máninde, kólik-logıstıka salasy — basymdyqqa ıe baǵyt. Qazir memleketter kólik-logıstıka múmkindikterine ıe bolý úshin básekege túsip jatyr. Qazir, eń basty áleýet — tabıǵı resýrstar emes, taýar tasymaldaý, logıstıkalyq tizbekterdi jolǵa qoıý. Eńbekterińizdi baǵalaımyn. Eń bastysy, sizderdiń qyzmetterińizdi qoǵam aıryqsha qurmetteıdi. Sizder mol tájirıbelerińizge súıene otyryp, tıisti mınıstrlik pen temirjol basshylaryna usynystar men qundy keńes beresizder dep senemin. Sondyqtan birge jumys isteýimiz kerek, — dedi Qasym-Jomart Toqaev.
Óz kezeginde ardagerler temirjol salasynda kadr máselesi kóp nárseni sheshetinin aıtty.
Olardyń pikirinshe, temirdeı tártip, eńbekqorlyq, berilgen tapsyrmany buljytpaı oryndaıtyn kásibıliktiń arqasynda temirjolshylar ózderine júktelgen mindetti oryndap kele jatyr.
Sonymen qatar olar kólik salasy el ekonomıkasynda jetekshi ról atqaratynyn atap ótip, sońǵy jyldary júk tasymalynyń kólemi ulǵaıa túskenin, arnaıy Kólik mınıstrligin qurý nátıjesinde salany damytýǵa erekshe kóńil bólinip jatqanyn jetkizdi.
Ardagerler bıyl negizi qalanǵanyna 120 jyl tolǵan, el ekonomıkasynyń kúretamyry sanalatyn temirjol toqtaýsyz júre bersin degen tilekpen Memleket basshysyna shoıynjol qyzmetkeriniń qolshamyn tartý etti.
