Memleket basshysy Temirbeton buıymdary zaýytyna bardy
Memleket basshysy Qyzylorda oblysyna jumys sapary barysynda Temirbeton buıymdary zaýytyna bardy, dep habarlaıdy Kazinform agenttigi Aqordanyń baspasóz qyzmetine silteme jasap.
«Qurylys-kólik kompanııasy» JShS bıyl iske qosqan jobanyń jalpy quny – 2,6 mıllıard teńge. Onyń 370 mıllıon teńgesi «Damý» kásipkerlikti qoldaý qory arqyly qarjylandyrylǵan. Kombınat kúnine 200 tekshe metr temirbeton buıymdaryn óndiredi. Óndiriske qajetti shıkizattar jergilikti jerden alynady.
Sonymen qatar Memleket basshysyna aımaqtaǵy kásiporyndardan shyǵatyn basqa da ónim túrleri tanystyryldy. Olardyń basym bóligi – qurylys salasy úshin asa qajetti materıaldar. Atap aıtqanda, tabaqsha shyny («OrdaGlass» JShS), PVH-qubyrlary men fıtıngter («KNK Kemıkal» JShS), kaskalar («NP-Consalting» JShS), plıtka jelimderi men sándik sylaqtar («Vega-Prom» JShS), jol jáne trotýar bordıýrlerin, qum-keramzıt bloktaryn («Sadýakasov J.A» JK), qıyrshyq tastyń ártúrli fraktsııalaryn («Shalkiya Dolomite Operating» JShS), terezeler men aınalar («Komfort KZ» JShS), ák («Orda stroı market» JShS), kirpish ónimderin («Melıorator» JShS) jáne taǵy da basqa buıymdardy shyǵarady. Sondaı-aq kórmege «Dalatex» kompanııasynyń tekstıl buıymdary, «Órken Álem» JShS shyǵaratyn jeke qorǵanys quraldary qoıylǵan.
Prezıdent kásipkerlermen áńgimelesý barysynda shaǵyn jáne orta bıznesti órkendetý úshin memleket tarapynan jan-jaqty qoldaý kórsetiletinin aıtty.
Óndiris ornynda oblys ákimi Nurlybek Nálibaev Memleket basshysyna Qyzylorda óńiriniń áleýmettik-ekonomıkalyq damý qarqyny jóninde baıandady
Aımaq basshysynyń aıtýynsha,Qyzylorda oblysynyń jalpy áleýmettik-ekonomıkalyq damý kórsetkishterinde ósim baıqalady. Atap aıtqanda, óńdeý ónerkásibi 115,8 paıyzǵa (227 mlrd.teńge), aýyl sharýashylyǵy 101,6 paıyzǵa (157 mlrd.teńge), qurylys 126,4 paıyzǵa (117 mlrd.teńge), turǵyn úıler salý 118,9 paıyzǵa (618 myń sh.m), saýda-sattyq 104,1 paıyzǵa (531 mlrd.teńge) artqan. Negizgi kapıtalǵa quıylǵan ınvestıtsııa kólemin bıyl 472 mıllıard teńgege jetkizý josparlanyp otyr. Onyń basym bóligi jeke ınvestıtsııalarǵa tıesili. Oblysta «Jaıly mektep» ulttyq jobasy aıasynda aldaǵy úsh jyl ishinde 27 mektep salý josparlanǵan. Qazirgi kezde Qyzylorda qalasynda fızıka-matematıka baǵytyndaǵy mektep-ınternaty salynyp jatyr.
Emhanasy men onkologııalyq bólimshesi bar 300 oryndyq kópbeıindi aýrýhananyń, Qan ortalyǵynyń qurylysy júrgizilip jatyr. «Aýyldyq densaýlyq saqtaýdy jańǵyrtý» ulttyq jobasy aıasynda eldi mekenderde 27 medıtsınalyq-ambýlatorııalyq nysan salynyp jatyr;
Óńirde birqatar sport jáne áleýmettik-mádenı nysan boı kóteredi. Atap aıtqanda, jýyrda 7 myń oryndyq Ortalyq stadıonnyń, jabyq basseıni bar kópsalaly dene shynyqtyrý-saýyqtyrý kesheniniń qurylysy bastalady. Aýdandarda shaǵyn 11 dene shynyqtyrý keshenin salý úshin jergilikti bıýdjetten 2,6 mıllıard teńge bólingen. Oblys ortalyǵynda salynyp jatqan Óner ortalyǵy jyl aıaǵyna deıin el ıgiligine paıdalanýǵa beriledi.
Nurlybek Nálibaev óńirdiń tynys-tirshiligin túletýge jergilikti kásipkerler de eleýli úles qosyp jatqanyn aıtty. Áleýmettik nysandar salý, demalys saıabaqtaryn, oıyn-sport alańdaryn, úılerdiń qasbetterin jańartý, aýlalardy abattandyrý jumystary demeýshilerdiń kómegimen júzege asyrylyp keledi.
