Memleket basshysy telekópir arqyly KIA Qazaqstan avtomobıl zaýytyn ashty
ASTANA. KAZINFORM — Prezıdent Qasym-Jomart Toqaev is-sharaǵa qatysýshylardy zaýyttyń ashylýymen quttyqtap, bul elimizdegi mashına jasaý salasyn damytý baǵytyndaǵy óte mańyzdy qadam ekenine nazar aýdardy. Bul týraly Aqordanyń baspasóz qyzmeti habarlady.
Memleket basshysy osydan eki jyl buryn Qostanaıǵa sapary kezinde KIA Sportage avtokóliginiń óndirisi iske qosylǵanyn eske saldy. Búgin Kia Motors korporatsııasymen jasalǵan kelisimge sáıkes zaýyt ashyldy
Prezıdent qazir Qazaqstanda Koreıanyń 800-den astam kompanııasy tabysty jumys istep jatqanyn aıtty.
Qasym-Jomart Toqaev KIA Corporation prezıdenti Ho-sýng Songqa jáne kompanııaǵa shynaıy rızashylyǵyn bildirip, aýqymdy jumys atqarylǵanyn, nátıjesinde ózara tıimdi jáne jemisti baılanys nyǵaıa túskenin atap ótti.
– Jalpy, búgingi aıtýly oqıǵa Qazaqstan men Koreıa arasyndaǵy strategııalyq seriktestik pen tabysty qarym-qatynastyń jarqyn kórinisi ekeni anyq. Koreıa Respýblıkasy – Qazaqstannyń Azııadaǵy senimdi áriptesi. Biz yntymaqtastyǵymyzdy kúsheıte túsýge múddelimiz. Qazir Qazaqstanda Koreıanyń 800-den astam kompanııasy tabysty jumys istep jatyr. Sonyń ishinde avtokólik jasaý salasyn ózara tıimdi yqpaldastyq kózi dep aıtýǵa tolyq negiz bar. Búgin ashylyp jatqan biregeı zaýyt – sonyń aıqyn dáleli. KІA korporatsııasy avtomobıl shyǵaratyn álemdegi 10 iri kompanııanyń qataryna kiredi. Sondaı-aq KІA – Qazaqstan azamattary eń kóp satyp alatyn úsh kólik markasynyń biri. KIA brendiniń ataýy «kóterilip kele jatqan» jáne «Azııa» degen eki ıeroglıften quralýynyń sımvoldyq máni bar. Shyn máninde, kompanııa Azııanyń jańa ekonomıkalyq órleýi men gúldenýiniń jarqyn kórinisine aınaldy. KIA – keleshektiń korporatsııasy. Kásiporyn shyǵaratyn avtokólikterde ozyq tehnologııa, tartymdy dızaın jáne joǵary deńgeıdegi senimdilik úılesim tapqan, – dedi Prezıdent.
Aıta ketelik Tımýr Súleımenov avtokólikterge suranystyń artýy tutynýshylyq belsendiliktiń ósýin kórsetetinin aıtqan edi.