Memleket basshysy Tájikstan Prezıdentimen kezdesý ótkizdi
ASTANA. KAZINFORM – Qasym-Jomart Toqaev «Bolashaq oıyndary – 2026» halyqaralyq mýltısport týrnıriniń ashylý saltanatyna qurmetti qonaq retinde qatysqany úshin Emomalı Rahmonǵa alǵys aıtty.
Kezdesý barysynda prezıdentter strategııalyq seriktestik pen odaqtastyq rýhynda dáıekti túrde damyp kele jatqan qazaq-tájik qatynastarynyń qazirgi deńgeıin joǵary baǵalady.
Turaqty saıası dıalogtyń, sondaı-aq eki eldiń úkimetteri men isker toptary arasyndaǵy belsendi baılanystardyń mańyzy da atap ótildi.
Saýda-ekonomıkalyq qarym-qatynastardy odan ári keńeıtýge, kólik-logıstıka jáne energetıka salalaryndaǵy yntymaqtastyqty damytýǵa, sondaı-aq buǵan deıin qol jetkizilgen joǵary deńgeıdegi ýaǵdalastyqtardy júzege asyrýǵa basa nazar aýdaryldy.
Memleketter basshylary óńirlik jáne halyqaralyq kún tártibindegi ózekti máseleler jóninde pikir almasty. Sonymen qatar aldaǵy kópjaqty formattaǵy birlesken is-sharalardyń kestesin talqylady.
Aıta keteıik, Qasym-Jomart Toqaev «Bolashaq oıyndary – 2026» týrnıriniń ashylý saltanatynda sóz sóıleıdi.
