Memleket basshysy Tájikstan Prezıdentimen kelissóz júrgizdi
ASTANA. KAZINFORM — Qazaqstan men Tájikstan arasyndaǵy taýar aınalymy jyl saıyn 1 mlrd dollardan asyp otyr. Eki el saýda-ekonomıkalyq baılanystardy keńeıtip, kólik-logıstıka, mádenıet jáne bilim salalaryndaǵy yntymaqtastyqty jandandyrýda. Bul týraly Memleket basshysy Qasym-Jomart Toqaev Aqordada Tájikstan Prezıdentimen ótken kelissózde aıtty.
Prezıdent Qasym-Jomart Toqaev Tájikstan prezıdenti Emomalı Rahmonǵa iltıpat bildirip, bul sapar eki el arasyndaǵy erekshe qurmet pen shynaıy dostyqtyń kórinisi ekenin atap ótti.
— Búgin biz baýyrlas memleketterimizdiń strategııalyq seriktestigi men odaqtastyǵy jóninde tolyq negizde aıta alamyz. Ekijaqty yntymaqtastyqta qandaı da bir másele joq. Kópjaqty baılanystarymyzdy odan ári ilgeriletý maqsatynda qarastyryp, sheshimin tabýdy qajet etetin jaıttar bar. Jańa múmkindikterge jol ashý, ózara tıimdi jobalardy iske asyrý jáne qol jetkizilgen ýaǵdalastyqtardy oryndaý turǵysynan tek alǵa qaraı qadam basyp kelemiz. Qazaqtar tarıhy baı, tól mádenıeti men rýhanı murasy baıtaq kóne ult retinde tájik halqyna qurmetpen qaraıdy. Sizdiń parasatty ári kóregen saıasatyńyzdyń arqasynda Tájikstan kóptegen salada aýqymdy reformalar júrgizip, tańǵalarlyq tabystarǵa qol jetkizdi. Osy ózgeristerdiń nátıjesi ekonomıkanyń ornyqty ósiminen, halyqtyń ál-aýqatynyń artýynan kórinis taýyp otyr, — dedi Qazaqstan Prezıdenti.
Qasym-Jomart Toqaev barlyq baǵytta oń dınamıka kórsetip kele jatqan qazaq-tájik qarym-qatynasynyń damý deńgeıin joǵary baǵalady.
— Elderimizdiń úkimetteri ýaǵdalastyqtardy tolyǵymen júzege asyrý úshin belsendi jumys istep jatqanyn atap ótken jón. Qabyldanǵan sharalardyń arqasynda tasymaldanatyn taýar túrleri kóbeıip, túrli ónim kólemi artty. Temirjolmen jetkiziletin eksport-ımport júgi de ulǵaıyp keledi. Bıznes deńgeıindegi baılanystar jandandy. Bıznes-forým, arnaıy saýda mıssııalarynyń qorytyndysy boıynsha qol jetkizilgen kommertsııalyq ýaǵdalastyqtar josparly túrde iske asyrylýda. Bul rette elderimizdiń jyl saıynǵy taýar aınalymy turaqty túrde 1 mıllıard dollardan asady. Osynyń esebinen Qazaqstan udaıy Tájikstannyń eń iri saýda seriktesteriniń úshtigine enip otyr, — dedi Memleket basshysy.
Prezıdenttiń aıtýynsha, eki eldiń mádenı-gýmanıtarlyq baılanystary da dáıekti túrde keńeıýde.
— Mádenıet kúnderi alma-kezek ótkizilip, kórnekti tulǵalardyń eskertkishteri ashyldy. Dýshanbede Abaı bıýsti, Astanada Ibn Sına eskertkishi boı kóterdi. Bilim berý men jastar saıasaty salalaryndaǵy yqpaldastyq joǵary deńgeıde. Jastar, ǵalymdar men zııalylar forýmdary jıi ótkiziledi. Sondyqtan ózara yntymaqtastyqta qol jetkizgen nátıjeler úshin maqtanýǵa da, qýanýǵa da tolyq negiz bar. Búgin óte mańyzdy is-sharaǵa — Astana qalasynda Tájikstan elshiliginiń jańa ǵımaratynyń ashylýyna qatysamyz. Bul bir ǵımarattan ǵana turmaıdy, ony keshen deýge bolady. Munyń bári Tájikstannyń elimizde turaqty ókildigi bolatynyn aıǵaqtaıdy. Álbette, budan baýyrlastyq baılanystarymyzdyń biregeı sıpatyn kóremiz, — dedi Qasym-Jomart Toqaev.
Aıta keteıik, 5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Buǵan deıin Qasym-Jomart Toqaev Tájikstan prezıdentin elorda áýejaıynda qarsy alǵan edi.
Sondaı-aq E. Rahmon Astanada ótken Aqaba protsesi sammıtine qatysty. Bıylǵy sammıt «Jasandy ıntellekt salasyndaǵy qaýipsizdik» taqyrybyna arnalǵan.
