Memleket basshysy «Taraz» shaǵyn ındýstrıaldyq aımaǵyn aralap kórdi
TARAZ. KAZINFORM — Prezıdentke Jambyl oblysyna ınvestıtsııa tartý jáne agroónerkásip keshenin damytý jobalary tanystyryldy. Bul týraly Aqordanyń baspasóz qyzmeti habarlady.
Qasym-Jomart Toqaevqa ekonomıkany ındýstrıalandyrý, mal sharýashylyǵy men aýyl sharýashylyǵy ónimderin óńdeý, egis alqaptaryn ártaraptandyrý, sý únemdeý tehnologııasyn engizý baǵytynda atqarylyp jatqan jumystar týraly baıandalyp, ınvestıtsııalyq pýl týraly málimet berildi.
Jyl basynan beri óńirge 599,2 mıllıard teńge ınvestıtsııa tartylǵan, ósim 33 paıyz. Sońǵy eki jylda oblysta jalpy quny 242 mıllıard teńge bolatyn 56 ınvestıtsııalyq joba iske asyrylǵan.
Memleket basshysyna oblystaǵy jetekshi kásiporyndardyń jobalary kórsetildi. Olardyń qatarynda «Qazfosfat» seriktestiginiń mıneraldy tyńaıtqyshtar óndirý jáne YONGGANG CENTRAL IRON and STEEL kompanııasy salyp jatqan metallýrgııa zaýyty jobalary bar.
Sondaı-aq Jańatas qalasyndaǵy «EvroHım-Qarataý» aýqymdy ınvestıtsııalyq jobasynyń aralyq qorytyndysy usynyldy. Qazir kúkirt qyshqylyn óndiretin jańa zaýytty iske qosý aldyndaǵy tekserý jumystary júrgizilip jatyr. Alǵashqy ónim ishki naryqqa jóneltildi.
Aldaǵy ýaqytta paıdalanýǵa beriletin Shengtai Biotech Co.Ltd júgeri óńdeý zaýyty jóninde de baıandaldy. Shý aýdanyndaǵy bul jobaǵa 1,5 mıllıard dollar ınvestıtsııa salynǵan. Sonymen birge Baızaq aýdanyndaǵy Zhongkai Kazakhstan International Company qant zaýyty qurylysy jaıynda málimet berildi.
Budan bólek, KAZ FMWORLD AGRICULTURAL MACHINERY kompanııasynyń ındýstrıaldyq aımaqta shyǵarylatyn aýylsharýashylyq tehnıkalary kórsetildi.
Aıta ketelik Memleket basshysy Jambyl oblysyna jumys saparymen bardy. Sonymen qatar Prezıdent Jambyl oblysyndaǵy farmatsevtıkalyq kásiporyndardyń qyzmetimen tanysqan edi.