Memleket basshysy Taldyqorǵandaǵy Ústel tennısi ortalyǵyn aralap kórdi
TALDYQORǴAN. KAZINFORM — Qasym-Jomart Toqaev «Jetisý-Qoldaý» qoǵamdyq qorynyń demeýshiligimen salynǵan Ústel tennısi ortalyǵymen tanysty.
Halyqaralyq standarttarǵa saı, zamanaýı quraldarmen jabdyqtalǵan ǵımaratta Ústel tennısi oıyndary jáne sporttyq týrızmge mamandandyrylǵan balalar men jasóspirimderdiń sport mektebi ornalasqan.
Mektep dırektory Mereı Súıinovtiń aıtýynsha, qazir munda 600-den astam oqýshy tennısten bólek, toǵyzqumalaq, doıby, shahmat, qol kúresi jáne sporttyq týrızm sektsııalaryna qatysady. Olardyń arasynda 33 sport sheberine úmitker, 41 birinshi razrıadty sportshy bar.
Prezıdentke Jetisý oblysyndaǵy sport ınfraqurylymynyń damýy jóninde málimet berildi. Atap aıtqanda, qazir Alakól aýdanynyń Lepsi aýylynda jáne Tekeli qalasynda dene shynyqtyrý keshenderi, Panfılov jáne Sarqan aýdandarynda sport keshenderi salynyp, Taldyqorǵandaǵy Ortalyq stadıonǵa kúrdeli jóndeý júrgizilip jatyr. Sonymen qatar shaǵyn aýyldarda buqaralyq sportty damytý úshin modýldik keshender salý qolǵa alyndy.
Buǵan deıin Toqaev «Jetisý» voleıbol klýbynyń jaı-kúıimen tanysty.