Memleket basshysy «Taldyqorǵan» ındýstrııalyq aımaǵyna bardy
ASTANA. KAZINFORM - Qasym-Jomart Toqaevtyń Jetisý oblysyna jumys sapary «Taldyqorǵan» ındýstrııalyq aımaǵynda ornalasqan «ASMA INDUSTRIAL» óndiristik akkýmýlıator shyǵarý zaýytynyń jumysymen tanysýdan bastaldy, dep habarlaıdy Aqordanyń baspasóz qyzmeti.
Quny 8,5 mıllıard teńgeni quraıtyn joba byltyr qolǵa alynyp, aldymen ǵımaraty jańartylǵan. Bıýdjet qarajatyna elektr jabdyqtary ornatylyp, káriz jáne gazdandyrý jelileri tartylǵan. Aýmaǵy 14,3 gektar bolatyn zaýyt bıylǵy 6 jeltoqsan kúni iske qosyldy.
Prezıdentke óndiris ornyn tanystyrǵan «ASMA INDUSTRIAL» JShS quryltaıshysy ári zaýyt dırektory Serikbaı Ajmaǵambetovtiń aıtýynsha, munda munaı-gaz, taý-ken ónerkásibinde, telekommýnıkatsııada, temirjol salasynda, sondaı-aq «jasyl» energetıkada úzdiksiz energııa kózi retinde qoldanylatyn óndiristik akkýmýlıator batareıalary shyǵarylady.
Memleket basshysyna baıandalǵan málimetterge sáıkes, zaýyt tolyq qýatyna shyqqanda 180 jumys orny qurylyp, jylyna 210 myń akkýmýlıator óndiredi. Daıyndalǵan ónimniń 60 paıyzyn TMD jáne Baltyq elderine eksporttap, qalǵan 40 paıyzyn otandyq naryqta satýdy josparlap otyr. Sondaı-aq iske qosylǵan alǵashqy jyly bıýdjetke 500 mıllıon teńgeden astam salyq tóleıdi.
Zaýytqa qajetti shıkizattyń basym bóligi Qazaqstan kásiporyndarynan satyp alynady. Atap aıtqanda, «Kaztsınk» JShS-ten qorǵasyn, «Qazatomónerkásip» UK» AQ-dan kúkirt qyshqylyn alsa, separator men polıpropılendi Qytaıdan ımporttaıdy.
Qasym-Jomart Toqaev kásiporyn jumysshylarymen áńgimelesip, elimizdegi óndiristiń róli týraly aıtty.
– Memleket myqty bolsyn desek, eń aldymen, óńirlerimiz qýatty bolýy kerek. Óndirisi damyǵan elge aınalý úshin osy salaǵa kóńil bólip otyrmyz. Strategııalyq mańyzy bar Jetisý oblysyna erekshe nazar aýdaramyz, – dedi Prezıdent.
Budan keıin Memleket basshysy oblystaǵy kásiporyndardyń jetekshilerimen kezdesip, pikir almasty. Sondaı-aq otandyq bıznesti qoldaý memlekettik saıasattyń negizgi baǵyty ekenin jetkizdi.
Osyǵan deıin Qasym-Jomart Toqaevtyń Jetisý oblysyna barǵanyn jazdyq.
