Memleket basshysy Sunwah Group korporatsııasynyń tóraǵasyn qabyldady

ASTANA. KAZINFORM – Prezıdent Qasym-Jomart Toqaev Sunwah Group korporatsııasynyń tóraǵasy, Qytaı Halyqtyq saıası konsýltatıvtik keńesi Búkilqytaılyq komıtetiniń Turaqty komıtet múshesi, Gonkongtaǵy Qytaı bas saýda palatasynyń tóraǵasy Tsaı Gýanshenmen kezdesti.

Memleket basshysy Qazaqstan Qytaı Halyq Respýblıkasymen aradaǵy máńgi ári jan-jaqty strategııalyq seriktestikti belsendi túrde damytýǵa aıryqsha mańyz artatynyn atap ótti. Osy oraıda Prezıdent 2013 jyly QHR Tóraǵasy Sı Tszınpın alǵash ret Astanada usynǵan «Bir beldeý, bir jol» bastamasy tabysty iske asyrylyp jatqanyna nazar aýdardy.

Qasym-Jomart Toqaev eki eldiń saýda-ekonomıkalyq baılanystarynyń qarqynyna joǵary baǵa berip, búginde Qytaı Qazaqstannyń eń iri saýda seriktesi sanalatynyn, taýar aınalymy jyl saıyn rekordtyq mejeni baǵyndyryp otyrǵanyn aıtty.

Áńgimelesý barysynda ınvestıtsııalyq yqpaldastyqqa basa mán berildi. Memleket basshysynyń aıtýynsha, Qazaqstan shetelden ınvestıtsııa tartýǵa jaǵdaı jasap, birlesken strategııalyq jobalarǵa jan-jaqty qoldaý kórsetedi.

Prezıdent álem jasandy ıntellektiniń belsendi damý kezeńine qadam basqanyn atap ótti. Bul baǵytta Qytaı kósh bastap tur. Memleket basshysy Qytaı tarapymen atalǵan salada yntymaqtastyqty damytýǵa nıet bildirdi.

Ol Qazaqstannyń eń aldymen, qarjy sektoryndaǵy ınvestorlar úshin tartymdy ári senimdi ınvestıtsııalyq ıýrısdıktsııasyn joǵary baǵalady. Korporatsııa basshysynyń aıtýynsha, buǵan Prezıdent Qasym-Jomart Toqaev pen Tóraǵa Sı Tszınpın tarapynan kórsetilgen júıeli qoldaý oń septigin tıgizip otyr.

Kezdesý barysynda qarjy, energetıka, tsıfrlandyrý, medıtsına, aýyl sharýashylyǵy jáne qurylys salalaryndaǵy yqpaldastyqtyń perspektıvti baǵyttary qarastyryldy.

Aıta keteıik, Prezıdent áleýmettik qoldaýdyń shyn muqtaj jandarǵa jetýin qadaǵalaýdy tapsyrdy.