Memleket basshysy sý tasqyny jaıly: Ár qıyndyqtyń qaıyry bar
ASTANA. KAZINFORM – Tasqyn kezinde el birligi nyǵaıa tústi. Bul týraly Memleket basshysy Qasym-Jomart Toqaev «Birlik. Jasampazdyq. Órleý» taqyrybymen ótip jatqan Qazaqstan halqy Assambleıasynyń kezekti HHHІІІ sessııasynda aıtty.
«Qazaqta «Alpys kún tasyǵan darııa, alty kúnde qaıtady» degen sóz bar. Kóp uzamaı qarǵyn sý ketip, jurt kúndelikti ómirge oralady. «Ár qıyndyqtyń qaıyry bar» deıdi halqymyz. Birinshiden, tasqyn kezinde el birligi nyǵaıa tústi. Arqadaǵy aǵaıynǵa, Jaıyqtaǵy jurtqa búkil Qazaqstan halqy kómektesýge umtyldy. Apat aımaǵynda turatyn adamdar barsha otandasymyzdyń shynaıy janashyrlyǵyn sezindi. Ekinshiden, eldiń jaǵdaıyn jaqsartý úshin eshkim qıyndyqtyń kelýin kútip otyrmaıtyny anyq. Degenmen, mundaı apattar biraz sharýany shuǵyl qolǵa alýǵa sebepker bolady. Tasqyn aıaqtalǵan soń keıbir aýyldar tyń jerge qonystanyp, jańadan boı kóteredi. Jol salynady, sý tartylady. Aýyldarymyz múlde jańa kelbetke ıe bolady. Jalpy, álemdegi úlken daǵdarystardyń qarqyndy damýǵa jol ashatyny belgili», - dedi Prezıdent.
Memleket basshysy qazirgi alapat tasqyn da, túptep kelgende, elimizge oń áserin tıgizedi dep oılaıtyndyǵyn aıtty.
«Syn saǵatta judyryqtaı jumylǵan jurtymyz osy qalpynda órleý, jańǵyrý kezeńine qadam basady. Bári de jaqsy bolady. Bárimiz – bir eldiń azamatymyz. Tarıh toǵystyrǵan taǵdyrymyz – bir, senimmen qadam basatyn keleshegimiz – bir. Biz birtutas ult retinde árdaıym babalar amanatyna adal bolamyz. Qasıetti qara shańyraǵymyz – Qazaqstannyń jarqyn bolashaǵyn birge jasaımyz. Bizdiń maqsatymyz – aıqyn, bul – Ádiletti Qazaqstandy qurý. Men Qazaqstan Respýblıkasynyń Táýelsizdigin qorǵaýdy Prezıdent retindegi eń basty mindetim dep sanaımyn. Osy qasterli mindet Ádiletti Qazaqstandy qurý jáne belsendi ári syndarly syrtqy saıasat júrgizý arqyly ǵana oryndalady. Bıik maqsatqa jetý úshin túrli kedergiden ótemiz, barlyq qıyndyqty jeńemiz. Aýqymdy mindetterdi oryndaımyz. Biz elimizdiń basty qundylyqtary men baǵyt-baǵdarynan aınymaımyz. Memlekettiligimizdi nyǵaıtyp, táýelsizdik týyn árdaıym bıik ustaımyz. Men buǵan nyq senemin jáne sol úshin bárin jasaımyn. Bul – meniń prezıdenttik ári perzenttik paryzym. Elimiz aman, jurtymyz tynysh bolsyn!», - dedi Qasym-Jomart Toqaev.
