Memleket basshysy: Sońǵy jyldary tikeleı saılaý ınstıtýtyn aıtarlyqtaı keńeıttik
ASTANA. KAZINFORM — Prezıdent Respýblıka kúnine arnalǵan saltanatty jıynda sóılegen sózinde sońǵy jyldary tikeleı saılaý ınstıtýtyn aıtarlyqtaı keńeıgenin aıtty. Bul týraly Aqorda málim etti.
— Saıası baǵdarymyz ben qabyldaǵan naqty sheshimderimiz ultymyzdyń uzaq merzimdi múddesi men memlekettiń qaýipsizdigin qorǵaý, eldi damytý qaǵıdattaryn kózdeıdi. Muny berik ustanamyz. Joldaýda bir palataly Parlamentti proportsıonaldy saılaý júıesi arqyly jasaqtaý qajet ekenin ashyq aıttym. Bir palataly Parlamentti tek partııalyq tizim boıynsha qalyptastyrý partııalardyń ınstıtýtsıonaldyq negizin nyǵaıtýǵa septigin tıgizedi. Saılaýshylarmen júıeli jumys isteýine yqpal etedi. ıAǵnı memlekettiligimizge paıda ákeledi. Bul eshqandaı keri ketý nemese demokratııalyq qaǵıdattardan bas tartý emes. El qamyn oılap, saıası turǵydan salmaqtap osyndaı uıǵarymǵa keldim. Aımaqtyq deńgeıde azamattar bılikpen tikeleı ári turaqty qarym-qatynas jasaıdy. Sondyqtan jergilikti máslıhattar men ákimdikter belsendi jumys istep, eldiń muń-muqtajyn sheshýde mańyzdy ról atqaratynyn kórsetýge tıis. Sońǵy jyldary tikeleı saılaý ınstıtýtyn aıtarlyqtaı keńeıttik. Áýeli aýyl ákimderin saılaýdy engizdik, keıin ol aýdan, sodan soń oblystyq mańyzy bar qala basshylaryn saılaýǵa ulasty. Sol sebepti Qazaqstanda aı saıyn túrli elektoraldy naýqan júrip jatady. Bul bizdiń óńirdegi biregeı saıası tájirıbe sanalady. Barshamyz osynaý istiń maqsatqa saı oryndalýyn baqylap, eger onyń jaǵymsyz saldary bolsa, shara qabyldaý qajet. Reformalar — tabıǵı úderis, munda artyq konservatızmge oryn joq. Jergilikti máslıhattardy saılaýda majorıtarlyq júıeni saqtaý kerek dep sanaımyn, — dedi ol.
Sondaı–aq Memleket basshysy «Memlekettik mańyzy bar kez kelgen másele boıynsha sheshýshi sózdi azamattarymyz aıtýǵa tıis» dedi.
— Konstıtýtsııalyq reforma jasalǵan kezde, sondaı-aq atom stantsııasyn salý máselesin talqylaǵan ýaqytta dál solaı bolǵan. Qazir de solaı bolmaq. Bul elimizde jańa saıası mádenıettiń paıda bolǵanyn kórsetedi, ıaǵnı bul — qoǵam kókeıinde júrgen asa ózekti máselelerdi sheshýdiń jańa dástúri qalyptasyp jatyr degen sóz. Azamattar óz Otanynyń keleshegine shynaıy alańdap, onyń damý jolynda aıanbaı ter tókse, ult shyn máninde egemen elge aınalady. Ózge memleketter de ony solaı qabyldaıdy. Tipti ol bir qaraǵanda usaq ispen aınalysqandaı kóringenimen, shyn máninde óte mańyzdy jumys atqarsa, mysaly, kógaldandyrýmen, ózi turatyn aýmaqty tazalaýmen shuǵyldansa, qal-qaderinshe qoǵamdyq tártiptiń saqtalýyn qadaǵalasa, vandalızm men dóreki qylyqtarǵa qarsy tursa elge paıdasyn tıgizedi. Ózine, otbasyna, týǵan eline jany ashıtyn otandastarymyzdyń úlkendi-kishili jetistikterine kún saıyn kýá bolyp júrmiz. Olar shynaıy patrıottyǵynyń arqasynda osyndaı dárejege jetip otyr. Barshańyzǵa málim, jyl saıyn azamattarymyz túrli salada top jarady. Bul halqymyzdyń jasampaz bolmysyn pash etedi. Jastardy osyndaı izgi amaldar jasaýǵa yntalandyrady, ulttyq rýhymyzdy janı túsedi, — dedi Prezıdent.
Aıta keteıik, Memleket basshysy «Qazaqstan Respýblıkasy kúshti prezıdenttik bılikke arqa súıegen memleket bolyp qalýǵa tıis» degen oıyn aıtty.