Memleket basshysy: Sońǵy jeti jylda áleýmettik salaǵa 88 trln teńge bólindi
ASTANA. KAZINFORM — Memleket basshysy Qasym-Jomart Toqaev Respýblıka kúnine arnalǵan saltanatty jıynda sóz sóılep, áleýmettik jeńildikterdi qaıta qaraý máselesin kóterdi, dep habarlaıdy Aqordanyń baspasóz qyzmeti.
Onyń aıtýynsha, áleýmettik jeńildikterdiń berilý tártibin zertteý qajet.
— Sońǵy jeti jylda áleýmettik salany damytýǵa 88 trıllıon teńge qarjy bólindi. Muny halyqtyń ál-aýqatyn jaqsartý úshin salynǵan ınvestıtsııa dep qabyldaǵan jón. Qazir barlyq aımaqta, ásirese, aýyldyq jerler men shalǵaı eldi mekenderde medıtsınalyq qyzmettiń sapasy artyp kele jatyr. 2019 jyldan beri elimiz boıynsha 1259 densaýlyq saqtaý mekemesi salyndy. Konstıtýtsııamyzda aqysyz medıtsınalyq kómektiń kepildi kólemi týraly aıqyn jazyldy. Elimizdiń azamattary medıtsınalyq qyzmettiń 1 myńnan astam túrin aqysyz alýǵa quqyly. Bul, túptep kelgende, biregeı áleýmettik kómek desek, artyq bolmas. Sonymen qatar elimizdiń árbir mektebinde barlyq bastaýysh synyp oqýshylary jáne áleýmettik jaǵynan osal toptaǵy balalar, ıaǵnı, bir mıllıon jeti júz myńnan astam oqýshy aqysyz ystyq tamaq alýda. Elimizde neshe túrli áleýmettik jeńildikter bar, tipti, olardyń keıbiri jymqyrý negizinde berilip jatyr. Sondyqtan qazir Úkimet bul máseleni jan-jaqty zerttep, osy jumyspen aınalysýda, — dedi Memleket basshysy.
