Memleket basshysy: Sıntetıkalyq esirtkiniń zańsyz aınalymy alańdaýshylyq týǵyzyp otyr

ASTANA. KAZINFORM – Memleket basshysy ekinshi «Ortalyq Azııa – Reseı» sammıtinde Jasandy ıntellektini qoldana otyryp, kıberqorǵaýdy qamtamasyz etý jáne kıberqylmysqa qarsy turý máseleleri boıynsha sharalar qabyldaýdyń ózektiligine toqtaldy. Bul týraly Aqordanyń baspasóz qyzmeti habarlady.

Prezıdenttiń pikirinshe, qaýipsizdikti qamtamasyz etý – mańyzdy máseleniń biri. Qazir halyqaralyq jaǵdaı kúrdeli ári sát saıyn qubylyp tur.

– Ózara qurmet pen senimge negizdelgen yntymaqtastyǵymyzdy jalǵastyrý barlyq syn-qaterdi eńserýge múmkindik beredi. Qazaqstan úshin terrorızm men ekstremızmge qarsy is-qımyldyń tıimdiligin arttyrý mańyzdy mindet sanalady. Esirtkiniń, onyń ishinde sıntetıkalyq esirtkiniń zańsyz aınalymy alańdaýshylyq týǵyzyp otyr. Atalǵan qaterdiń aldyn alý úshin quzyretti organdar birlesken áreketke kóship, arnaýly memleketaralyq qurylymdar, naqty aıtqanda, Orta Azııanyń óńirlik aqparattyq úılestirý ortalyǵy, ShYU Esirtkige qarsy ortalyǵy jáne taǵy basqalary qoldaýdy kúsheıte túsýi kerek. Qaýipsizdik keńesi hatshylarynyń birlesken jumysyn «Ortalyq Azııa – Reseı» formatynda jalǵastyrý qajet dep sanaımyn. Jasandy ıntellektini qoldana otyryp, kıberqorǵaýdy qamtamasyz etý jáne kıberqylmysqa qarsy turý máseleleri boıynsha sharalar qabyldaý mańyzdy, - dedi Qasym-Jomart Toqaev.

Buǵan deıin habarlaǵanymyzdaı, Qasym-Jomart Toqaev ekinshi «Ortalyq Azııa – Reseı» sammıtine qatysyp, birqatar ózekti máseleni atap ótti.