Memleket basshysy Sıngapýr Prezıdentimen kelissóz júrgizdi
ASTANA. KAZINFORM - Memleket basshysy Sıngapýr Respýblıkasynyń Prezıdenti Tarman Shanmýgaratnammen kelissóz júrgizdi, dep habarlaıdy Aqordanyń baspasóz qyzmeti.
Qasym-Jomart Toqaev qazaq delegatsııasyna syı-qurmet kórsetkeni úshin alǵys aıtyp, bul 20 jyldan astam ýaqyt ishinde Qazaqstan Prezıdentiniń Sıngapýrǵa jasaǵan birinshi sapary ekenin atap ótti. Sondaı-aq 1970-jyldary Keńes odaǵynyń dıplomaty retinde qyzmet etkendikten, bul eldi óte jaqsy biletinin jáne araǵa ýaqyt salyp munda Qazaqstan Prezıdenti retinde qaıta kelgenine qýanyshty ekenin jetkizdi.
Memleket basshysy Sıngapýrdy ýaqyt synynan ótken senimdi seriktes sanaıdy. Búginde Qazaqstanda 140-tan astam sıngapýrlyq kompanııa men birlesken kásiporyn jumys isteıdi. Bul rette Sıngapýrdyń Qazaqstan ekonomıkasyna salǵan ınvestıtsııasy 1,7 mıllıard dollardan asty. Pandemııa saldarynan týyndaǵan ekonomıkalyq qıyndyqtarǵa qaramastan, ekijaqty saýda kólemi kóp uzamaı 2 mıllıard dollardan asady.
Qazaqstan Prezıdentiniń aıtýynsha, elimiz senimdi saıası dıalogqa, qarqyndy damyp kele jatqan saýda jáne ınvestıtsııalyq baılanystarǵa baǵyttalǵan ekijaqty yntymaqtastyqtyń múlde jańa kezeńine jol ashýǵa nıetti.
Prezıdent Tarman Shanmýgaratnam eki el arasyndaǵy qarym-qatynastyń damý dınamıkasyna joǵary baǵa berdi.
Kezdesý barysynda memleketter basshylary saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty damytý perspektıvalaryn egjeı-tegjeıli talqylady.
Memleket basshysy Qazaqstannyń Sıngapýrmen energetıka, asa mańyzdy shıkizatty óńdeý, ınfraqurylymdy damytý, tsıfrlyq ekonomıka, qarjy tehnologııasy, agrotehnologııa, logıstıka jáne baılanys sekildi negizgi salalar boıynsha yntymaqtastyqty keńeıtýge múddeli ekenin málimdedi.
Prezıdentter ózara tıimdi ınvestıtsııalyq jobalardy ilgeriletý, sonyń ishinde ekijaqty qatynastardyń quqyqtyq bazasyn nyǵaıtý arqyly kúsh-jiger biriktirýge ýaǵdalasty.
Taraptar bilim berý jáne adam kapıtalyn damytý baǵyttaryndaǵy yntymaqtasty jandandyrý qajet dep sanaıdy.
