Qazaqstan Sıngapýrdyń Ortalyq Azııa elderimen yntymaqtastyǵyn nyǵaıtýǵa yqpal etedi - Vong
ASTANA. KAZINFORM - Prezıdent Qasym-Jomart Toqaev jaqynda Sıngapýrdyń Premer-mınıstri laýazymyna taǵaıyndalǵan Loýrens Vongty quttyqtap, onyń jańa memlekettik qyzmetine tabys tiledi, dep habarlaıdy Aqordanyń baspasóz qyzmeti.
Memleket basshysy Sıngapýr Qazaqstannyń Ońtústik-Shyǵys Azııadaǵy strategııalyq seriktesi ekenin atap ótip, eki el arasyndaǵy kópjyldyq yqpaldastyqqa joǵary baǵa berdi.
– Biz Sıngapýrmen aradaǵy kópjaqty yntymaqtastyqty damytýǵa basa mán beremiz. Eki el arasyndaǵy tyǵyz baılanystyń uzaq jyldar boıy berik dástúri qalyptasqan. Men Sıngapýrmen qarym-qatynas ornatýǵa tikeleı atsalystym. 1970-jyldary jas dıplomat retinde maǵan Sıngapýrda qyzmet etý baqyty buıyrdy. Ózim jumys istegen jerdiń mekenjaıy da áli esimde – Nassim road 51, – dedi Qasym-Jomart Toqaev.
Qazaqstan Prezıdenti Sıngapýrdyń óte qarqyndy damyp kele jatqanyn, sondaı-aq bul eldiń álemdik ekonomıkada jetekshi oryn alatynyn aıtty.
Qasym-Jomart Toqaev óziniń Sıngapýrǵa alǵashqy memlekettik sapary ekijaqty qatynastarǵa tyń serpin beretinine senim bildirip, ol úshin qajetti qoldaý kórsetýge daıyn ekenin jetkizdi.
Memleket basshysynyń aıtýynsha, osy sapar aıasynda jetekshi jergilikti kompanııalardyń basshylarymen kezdesip, ózara múddeni kózdeıtin naqty bıznes-jobalardy talqylaý josparlanyp otyr.
Sıngapýr Premer-mınıstri ózara tıimdi yntymaqtastyqty damytý úshin mol áleýet bar ekenin atap ótti.
Loýrens Vong eki eldiń ekonomıkasy bir-birin tolyqtyratynyn jáne Sıngapýr ASEAN elderimen yqpaldastyqty keńeıtýde Qazaqstan úshin ózindik hab bola alatynyn, al Qazaqstan Sıngapýrdyń Ortalyq Azııa elderimen yntymaqtastyǵyn nyǵaıtýǵa yqpal etetinin málimdedi.
Kezdesýde ekonomıkalyq jáne ınvestıtsııalyq yqpaldastyq perspektıvalaryna erekshe nazar aýdaryldy. Taraptar jasyl energetıka, kólik jáne logıstıka, tsıfrlandyrý, qarjy, agroónerkásip kesheni, kommýnıkatsııa, asa mańyzdy shıkizatty óndirý jáne óńdeý, elektrondy kommertsııa sııaqty salalardaǵy yntymaqtastyqty nyǵaıtý múmkindikterin qarastyrdy.
Qasym-Jomart Toqaev pen Loýrens Vong Almaty oblysynda sıngapýrlyq Surbana Jurong kompanııasynyń qatysýymen Alatau City (G4 City) sııaqty asa iri jobany iske asyrýdy, sondaı-aq Transkaspıı halyqaralyq kólik baǵytynyń áleýetin arttyrýǵa baǵyttalǵan PSA International jáne «Qazaqstan temir joly» AQ arasyndaǵy seriktestikti quptady.
Kezdesýde bilim jáne ǵylym salasyndaǵy qarym-qatynasty nyǵaıtý, onyń ishinde joǵary oqý oryndary arasyndaǵy kooperatsııany arttyrý, stýdentter almasý jáne taǵy basqa máselelerge erekshe nazar aýdaryldy.
Taraptar Qazaqstan men Sıngapýrdyń isker toptary arasyndaǵy baılanystardy keńeıtý úshin kúsh-jiger biriktirýge ýaǵdalasty. Memleket basshysy eki eldiń kópjosparly áriptestigin nyǵaıtýǵa septigin tıgizetin Úkimetaralyq komıssııa qurýdy usyndy.
Kezdesý sońynda Qasym-Jomart Toqaev Loýrens Vongty Qazaqstanǵa resmı saparmen kelýge shaqyrdy.
Sodan keıin Qazaqstan Prezıdenti men Sıngapýr Premer-mınıstri sapar barysynda qol qoıylǵan qujattardy almasý rásimine qatysty. Qazaqstan Premer-Mınıstriniń orynbasary – Syrtqy ister mınıstri Murat Nurtileý men Sıngapýrdyń Ornyqty damý jáne qorshaǵan orta mınıstri, Saýda baılanystaryna jaýapty mınıstr Greıs Fý bir-birimen sımvoldyq turǵyda qujat almasty.
