Memleket basshysy Silk Way Star halyqaralyq jobasynyń qatysýshylaryn quttyqtady

ASTANA. KAZINFORM - Qurmetti Silk Way Star qatysýshylary! Búgin bedeldi halyqaralyq óner dodasy óz máresine jetedi. Barshańyzdy shyn júrekten quttyqtaımyn!

Bul týraly Aqordanyń baspasóz qyzmetiz habarlady.

-Bul – Azııa elderiniń rýhanı yqpaldastyǵyn nyǵaıtyp, halyqtarymyzdyń dostyǵyn bekemdeı túsetin biregeı bastama. Silk Way Star – mádenı dıplomatııanyń aıqyn kórinisi, ulttarymyzdyń salt-dástúri men shyǵarmashylyǵyn pash etetin tamasha joba. Osyndaı aýqymdy is-sharalar yntymaǵymyzdy kúsheıtedi, ortaq qundylyqtarymyzdy jan-jaqty dáripteıdi. Teńdessiz jobany tabysty júzege asyrýǵa mol úles qosqan China Media Group medıakorporatsııasyna shynaıy rızashylyǵymdy bildiremin,-dedi Prezıdent.

Sondaı-aq Memleket basshysy Ázerbaıjan, Armenııa, Grýzııa, Qazaqstan, Qytaı, Qyrǵyzstan, Malaızııa, Mońǵolııa, Tájikstan, Túrikmenstan, Ózbekstan, Ońtústik Koreıa elderinen kelgen daryn ıeleri óte joǵary deńgeıde óner kórsetip, mıllıondaǵan kórermenniń ystyq yqylasyna bólenip jatqanyn aıtty.

-Barshańyzǵa alǵys aıtamyn. Aldaǵy ýaqytta da bıik belesterdi baǵyndyra beresizder dep senemin! Sizderge amandyq jáne sáttilik tileımin!,-dedi Qasym-Jomart Toqaev.

Aıta keteıik, osy ýaqytta Jibek Joly telearnasynan Azııanyń alǵashqy vokaldyq megajobasy — Silk Way Star-dyń fınaldyq shoýy translıatsııasy ótip jatyr. Joba kórsetilimi shamamen 1 mlrd adamdy qamtıdy.