Memleket basshysy Shveıtsarııa vıtse-prezıdenti Gı Parmelanmen kelissóz júrgizdi
ASTANA. KAZINFORM — Qasym-Jomart Toqaev Gı Parmelannyń Astanaǵa sapary ekijaqty kún tártibine tyń serpin berip, jańa múmkindikterge jol ashatynyn jetkizdi. Bul týraly Aqordanyń baspasóz qyzmeti habarlady.
Memleket basshysy Qazaqstan Shveıtsarııany Eýropadaǵy mańyzdy saıası jáne ekonomıkalyq seriktes, sondaı-aq 2005 jyldan beri elimizge 35,8 mıllıard dollar quıǵan iri ınvestorlardyń biri retinde qarastyratynyn aıtty. Prezıdent elimizde shamamen 400 shveıtsarııalyq kompanııa men birlesken kásiporyn jumys isteıtinine toqtaldy.
Qasym-Jomart Toqaevtyń pikirinshe, Astana men Bern arasyndaǵy saıası dıalog ashyq ári syndarly sıpatta jan-jaqty damyp keledi.
Memleket basshysy ekonomıkalyq yntymaqtastyqtyń damý qarqynyna nazar aýdardy. Qazaqstan men Shveıtsarııa energetıka, taý-ken ónerkásibi, óńdeý ındýstrııasy, qurylys, aýyl sharýashylyǵy, farmatsevtıka, qarjy jáne jańa tehnologııa salalarynda tabysty yqpaldastyq ornatqan.
Gı Parmelan Qasym-Jomart Toqaevqa qonaqjaılyq tanytqany úshin rızashylyǵyn bildirip, ózara baılanystyń qarqynyn joǵary baǵalady.
Sondaı-aq Shveıtsarııanyń saıası dıalogty nyǵaıtýǵa, ınvestıtsııalyq jobalardy keńeıtýge jáne ekonomıkanyń negizgi sektorlarynda birlesken bastamalardy ilgeriletýge nıetti ekenin rastady.
Aıta ketelik Qazaqstan men Shveıtsarııa arasyndaǵy taýar aınalymy 1,1 mlrd dollar boldy.
