Memleket basshysy Іshki ister mınıstri Erjan Sádenovti qabyldady
ASTANA. KAZINFORM – Erjan Sádenov eldegi krımınogendik jaǵdaı jáne ishki ister organdarynyń «Zań men tártip» qaǵıdatyn iske asyrý barysy jóninde aqparat berdi. Bul týraly Aqordanyń baspasóz qyzmeti habarlady.
Sonymen qatar mınıstr elimizde qabyldanǵan keshendi sharalar nátıjesinde byltyr qylmys sany 12,7 myńǵa azaıǵanyn baıandady. Onyń aıtýynsha, sońǵy jyldary qylmys deńgeıiniń, ásirese, kisi óltirý, qaraqshylyq, tonaý men urlyq sııaqty asa aýyr qylmys túrleri kórsetkishteriniń aıtarlyqtaı tómendeýi baıqalady.
Tergeýdiń zamanaýı ádisterin engizý arqyly qylmystyń barlyq sanaty boıynsha ashylýy jaqsara túsken.
Qylmyskerlerdi izdestirý jumystarynyń nátıjesi týraly aıtty. 2024 jyly polıtsııa izdeýde júrgen 1949 adamdy ustaǵan.
Uıymdasqan, kıber jáne esirtki qylmystaryna qarsy is-qımyl, sondaı-aq quqyq buzýshylyqtardyń aldyn alý jónindegi Prezıdent tapsyrmalarynyń oryndalý barysyn tanystyrdy.
Aıtýynsha, uıymdasqan qylmystyq topqa qatysqany úshin 264 adam qylmystyq jaýapkershilikke tartylǵan. Sońǵy 12 aıda esirtki taratýǵa qatysty aqparat jarııalaǵan 7500-ge jýyq ınternet-resýrs anyqtalyp, 22 tonnaǵa jýyq esirtki aınalymǵa jiberilmegen, 64 esirtki zerthanasy joıylǵan. Internet-alaıaqtardyń 65 mıllıon qońyraýy buǵattalǵan. Nómirlerdi aýystyrýǵa arnalǵan 48 SIM-box qurylǵysy áshkerelengen. Alaıaqtardyń 2 mıllıard teńgeden astam qarjyny elden shyǵarýyna jol berilmegen.
Kámelet jasyna tolmaǵandardyń quqyqtaryn qorǵaý, kóshi-qondy baqylaýdy kúsheıtý, jol qaýipsizdigin qamtamasyz etý, qylmystyq-atqarý júıesin jetildirý jónindegi sharalar týraly habardar etti.
Qasym-Jomart Toqaev eldegi quqyqtyq tártip pen qoǵamdyq qaýipsizdik deńgeıin odan ári arttyrý boıynsha birqatar tapsyrma berdi.