Bıylǵy bes aıda qylmys 9 paıyzǵa azaıdy: Іshki ister mınıstri Prezıdentke esep berdi
ASTANA. KAZINFORM - Memleket basshysy Іshki ister mınıstri Erjan Sádenovti qabyldady, dep habarlaıdy Aqordanyń baspasóz qyzmeti.
Prezıdent Qasym-Jomart Toqaevqa eldegi krımınogendik ahýal jáne ishki ister organdarynyń aldyna qoıylǵan mindetterdiń oryndalýy jóninde baıandaldy.
Memleket basshysyna 2026 jyldyń alǵashqy bes aıynyń qorytyndysy boıynsha tirkelgen qylmys sany byltyrǵy kezeńmen salystyrǵanda 9 paıyzǵa tómendegeni aıtyldy. Negizgi sanattar boıynsha quqyqbuzýshylyqtyń azaıýy jáne qylmysty ashý deńgeıiniń artýy baıqalady.
Aldyn alý is-sharalary men qoǵamdyq qaýipsizdikti saqtaý máselesine erekshe nazar aýdarylyp otyr.
Vedomstvo jazanyń bultartpas qaǵıdatyn dáıekti túrde qamtamasyz etip keledi. Esepti kezeńde ótken jyldary jasalǵan 1685 qylmys ashylǵan. Sot tóreliginen jasyrynyp júrgen 574 qylmysker, onyń ishinde 89-y shetelden tabyldy.
Mınıstr Memleket basshysyna kıberqylmysqa, esirtki qylmysyna, uıymdasqan qylmysqa jáne ekstremızmge qarsy kúres nátıjeleri jóninde aqparat berdi. Qylmystyq toptardyń jolyn kesý, azamattardy qaýip-qaterlerden qorǵaý, sondaı-aq qaýipsizdik salasyndaǵy halyqaralyq yntymaqtastyqty nyǵaıtý boıynsha keshendi is-sharalar qolǵa alynǵan.
Kezdesý sońynda Memleket basshysy eldegi qoǵamdyq qaýipsizdik pen quqyqtyq júıeni qamtamasyz etý úshin «Zań men tártip» qaǵıdatyn naqty júzege asyrý jóninde birqatar tapsyrma júktedi.
Aıta keteıik, osyǵan deıin Memleket basshysy Premer-mınıstrdiń orynbasary Qanat Bozymbaevty qabyldady.
