Memleket basshysy «ShYU plıýs» sammıtine qatysty
ASTANA. KAZINFORM — Qasym-Jomart Toqaev «Kópjaqty yntymaqtastyqty damytý, óńirlik qaýipsizdik pen ornyqty damýdy qamtamasyz etý» taqyrybyna arnalǵan «ShYU plıýs» sammıtinde sóz sóıledi. Bul týraly Aqordanyń baspasóz qyzmeti habarlady.
Prezıdent Qytaıdyń tóraǵalyǵy aıasynda ShYU halyqaralyq qoǵamdastyqtaǵy óz pozıtsııasyn aıtarlyqtaı kúsheıtkenine nazar aýdardy.
Memleket basshysynyń aıtýynsha, byltyr Astanadan bastaý alǵan «ShYU plıýs» formaty Uıymnyń kún tártibimen úılesim tapty. Kóptegen memlekettiń qyzyǵýshylyǵy artqan Uıym qazirgi zamannyń ózekti problemalary jónindegi nátıjeli pikir almasý alańyna aınala bastady.
– Álemdegi úreıli úrdisterdi eskersek, munyń mańyzy óte zor. Ol qaýip-qaterler barshańyzǵa málim. Bul máseleni qaıta aıtýdyń máni joq. Áıtse de bir jaıtty atap ótkim keledi. Atalǵan jaǵdaıdyń sebebi men saldary uqsas. ıAǵnı ózara senim men álemdik tártiptiń keleshegine jaýapkershiliktiń joqtyǵy, kópjaqty dıplomatııa men halyqaralyq uıymdardyń áleýetin jete baǵalamaý osyndaı ahýal qalyptastyrdy. Bir nárse anyq, eshqandaı el qazirgi cyn-qaterlerdi jalǵyz ózi eńsere almaıdy. Meniń paıymdaýymsha, mundaı qıyn kezeńde Shanhaı yntymaqtastyq uıymynyń kún tártibi jasampaz ári oń sıpatta bolýǵa tıis. Uıym qaqtyǵys jaǵdaılaryn sheshýge, álemdi qorǵap, memleketterdiń ornyqty damýyna jol ashatyn jahandyq dıalogty kúsheıtýge baǵyttalǵan strategııalyq sheshimder ázirleýi kerek, – dedi Prezıdent.
Qasym-Jomart Toqaevtyń pikirinshe, birlesken kúsh-jiger jumyldyrý arqyly qarýly qaqtyǵystardyń ýshyǵýyna jol bermeý qajet.
– Jaqynda biz qos tarıhı datany – Ekinshi dúnıejúzilik soǵystyń aıaqtalǵanyna jáne Birikken Ulttar Uıymynyń qurylǵanyna 80 jyl tolýyn atap ótemiz. Qytaı kommýnıstik partııasynyń jetekshiligimen uly qytaı halqynyń japon basqynshylyǵyna qarsy soǵysta jetken jeńisine Qazaqstanda shynaıy qurmetpen qaraıdy. Kvantýn armııasyn talqandaý Ekinshi dúnıejúzilik soǵystyń núktesin qoıdy deýge bolady. Oǵan ıAlta konferentsııasynyń sheshimine sáıkes Keńes Odaǵynyń áskeri de qatysty. Qan maıdanda mıllıondaǵan adam qurban boldy. Sondyqtan atalǵan mereıtoı Jeńistiń ıdeologııalyq, saıası aspektilerine álemdik qoǵamdastyqtyń, ásirese, jastardyń nazaryn aýdarýǵa oraıly sát, – dedi Memleket basshysy.