Memleket basshysy Shymkent ákimine qalanyń damýyna qatysty naqty mindetter júktedi

ASTANA. KAZINFORM — Prezıdent Shymkent qalasynyń ákimi Ǵabıt Syzdyqbekovti qabyldady, dep habarlaıdy Aqordanyń baspasóz qyzmeti.

Memleket basshysyna qalanyń bıylǵy birinshi jartyjyldyqtaǵy áleýmettik-ekonomıkalyq damýy jaıynda esep berildi. Ǵabıt Syzdyqbekovtiń aıtýynsha, jyl basynan beri negizgi kapıtalǵa salynǵan ınvestıtsııa kólemi 31 paıyzǵa ulǵaıyp, 360 mıllıard teńgeni quraǵan. Bıyl ónerkásip salasynda jalpy quny 680 mıllıard teńge bolatyn ónim óndirilgen. Qurylys qarqyn alyp, 517 myń sharshy metrden astam turǵyn úı paıdalanýǵa berilgen.

Qasym-Jomart Toqaevqa Shymkenttiń ónerkásiptik áleýetin arttyrý úshin «Juldyz» jáne «Bozaryq» jańa ındýstrııalyq aımaqtary iske qosylǵany aıtyldy. Shaharda shaǵyn jáne orta bıznes sýbektileriniń sany 139 myńnan asty. Atalǵan sektorda 245 myńǵa jýyq adam jumys isteıdi.

Prezıdentke Shymkent qalasynyń ınfraqurylymyn jańǵyrtý jumystary jaıynda baıandaldy. Jańa áýejaı termınaly salynyp, temirjol vokzaly rekonstrýktsııadan ótti. «Keleshek mektepteri» ulttyq jobasy aıasynda 12 mektep jáne Oqýshylar saraıy paıdalanýǵa berildi. Sonymen qatar shaǵyn fýtbol ortalyǵy men sport kesheni boı kóterdi.

Memleket basshysyna jol-kólik ınfraqurylymynyń damýy jóninde aıtyldy. Ońtústik aınalma joly jáne 2 iri jolaıryq paıdalanýǵa berildi. Qoǵamdyq qaýipsizdikti qamtamasyz etý úshin byltyr — 2 270, bıyl 2 743 kóshe jaryqtandyryldy.

Prezıdent tapsyrmasyna saı, aktıvterdi memleket menshigine qaıtarý jumystary jalǵasyp jatyr. Atap aıtqanda, Muz saraıy, Ortalyq sý sporty kesheni, № 2 qalalyq emhana, «Qııal álemi» tehnoparki men «Keń baba» saıabaǵy memleket menshigine ótken.

Kezdesý sońynda Qasym-Jomart Toqaev Ǵabıt Syzdyqbekovke qala ekonomıkasyn odan ári ártaraptandyrý, qosymsha ınvestıtsııa tartý, shaǵyn jáne orta bıznesti qoldaý sharalaryn kúsheıtý, áýejaıǵa jańa ushý-qoný jolaǵyn tóseý, mektepterdegi oryn tapshylyǵy máselesin sheshý, qala turǵyndaryn baspanamen qamtý, sondaı-aq jol ınfraqurylymyn jańǵyrtý jóninde naqty mindetter júktedi.

Budan buryn Prezıdent Astana qalasy boıynsha UQK departamentiniń jańa ǵımaratyn aralaǵanyn habarlaǵan edik.