Memleket basshysy Shyǵys óńirindegi elıtalyq tuqym sharýashylyǵynyń qyzmetimen tanysty
ASTANA. KAZINFORM - Qasym-Jomart Toqaev «Maıly daqyldardyń tájirıbelik sharýashylyǵy» JShS-ine bardy, dep habarlaıdy Aqordanyń baspasóz qyzmeti.
Prezıdentke kópjyldyq praktıkalyq jáne ǵylymı-zertteý jumystarynyń nátıjesinde suryptalǵan kúnbaǵystyń jańa býdandary, sondaı-aq soıa men bıdaı sorttary tanystyryldy. Kásiporyn daıyndaıtyn tuqymdar otandyq sharýalardyń arasynda joǵary suranysqa ıe ári Reseı Federatsııasynyń 7 ólkesine eksporttalady.
Qasym-Jomart Toqaev elimizde maıly daqyldardyń egistik alańyn kóbeıtýdiń perspektıvasy jóninde surady. Mekeme basshysy Farıd Ábitaevtyń aıtýynsha, sońǵy kezde maıly daqyldardy egý kólemi jyl saıyn 12-15 paıyzǵa artyp keledi, sáıkesinshe, naryqtaǵy suranys ta joǵary.
Buǵan qosa, mol jem-shóp qory men selektsııalyq jumysty saýatty júrgizýdiń arqasynda agroónerkásip kesheni sút ónimderi baǵytyndaǵy jetekshi mal sharýashylyǵynyń qataryna kirdi.
Búginde seriktestiktiń taýarly sút fermalarynda 3 myńǵa jýyq iri qara bar. Olardyń kóbi – golshteın-frız tuqymyna jatatyn sıyrlar. Fermada táýligine 40 tonna sút óndirilip, elimizdegi tórt sút óńdeý zaýytyna jóneltiledi.
Memleket basshysy kásiporynnyń aýyl sharýashylyǵy ǵylymyndaǵy tabysyn oń baǵalap, mundaı tájirıbeni elimizdiń basqa óńirlerine taratý qajet ekenin aıtty.
Prezıdentke D.Serikbaev atyndaǵy Shyǵys Qazaqstan tehnıkalyq ýnıversıtetimen birlesip ashylǵan oqý kabıneti tanystyryldy. Munda jumysshylar óndiristen qol úzbeı, agromenedjmenttiń qyr-cyryn meńgeredi. Kásiporyn ósimdikterdi qorǵaıtyn zattar óndirý isi boıynsha úzdikterdiń biri sanalatyn shveıtsarııalyq Syngenta kompanııasymen jáne aýyl sharýashylyǵy tehnıkasyn shyǵarýshy amerıkalyq John Deere kompanııasymen de osyndaı yntymaqtastyqty jolǵa qoıyp jatyr.
