Memleket basshysy Shahmat úıine bardy
ASTANA. KAZINFORM – Qopa kóliniń jaǵasynda ornalasqan ǵımarat buryn Prezıdent rezıdentsııasy bolǵan. Memleket basshysynyń tapsyrmasymen atalǵan nysan balalardyń ıgiligine berilip, byltyr jeltoqsan aıynda Shahmat úıi retinde esigin aıqara ashty.
Búginde arnaýly ortalyqta oqý-jattyǵý jıyndary, grossmeısterlerdiń sheberlik saǵattary uıymdastyrylyp turady. Sportshylar bedeldi básekeler aldynda osy jerde daıyndyǵyn pysyqtaıdy.
Qazaqstan shahmat federatsııasynyń prezıdenti Tımýr Týrlovtyń aıtýynsha, kórikti tabıǵat aıasyndaǵy biregeı keshende sportshylardyń óz sheberligin alańsyz shyńdaýyna qolaıly jaǵdaı jasalǵan. Sońǵy jyldary shahmat «medal kóp ákeletin» sport túrine aınaldy. Byltyr otandyq sportshylar halyqaralyq jarystardan 160 medal jeńip alǵan bolatyn.
Qasym-Jomart Toqaev jas sportshylarmen jáne ulttyq qurama múshelerimen áńgimelesý barysynda memleket shahmatty damytýǵa, sondaı-aq balalar men jastar arasynda nasıhattaýǵa erekshe mán beretinin atap ótti. Prezıdent atalǵan oıyn strategııalyq turǵydan oılaýǵa mashyqtandyratynyn, tártipti kúsheıtip, tózimdilik pen jaýapkershilikke úıretetinin aıtty.
Aıta keteıik, Memleket basshysy telekópir arqyly Qosshy qalasyn tabıǵı gazǵa qosý rásimine qatysty.