Belgrad Qazaqstanmen ekonomıkalyq yqpaldastyqty odan ári tereńdetýge nıetti - Aleksandr Výchıch
BELGRAD. KAZINFORM - Memleket basshysy Serbııa Prezıdenti Aleksandr Výchıchpen shaǵyn quramda kelissóz júrgizdi. Qasym-Jomart Toqaev qonaqjaılyq tanytqany úshin Aleksandr Výchıchke rızashylyǵyn bildirip, Qazaqstan Prezıdenti retindegi Serbııaǵa alǵashqy saparynyń máni erekshe ekenin aıtty. Sonymen qatar bul sapar qazaq-serb qarym-qatynasynyń jańa kezeńine jol ashatynyn atap ótti. Bul týraly Aqordanyń baspasóz qyzmeti habarlady.
Memleket basshysy eki el arasyndaǵy ózara tıimdi yntymaqtastyq halyqtar dostyǵyna, saıası dıalog pen ózara qoldaýǵa udaıy arqa súıeıtinin jetkizdi.
Qasym-Jomart Toqaevtyń aıtýynsha, sońǵy jyldary Astana men Belgrad ekonomıkalyq yqpaldastyqty nyǵaıtý úshin naqty sharalar qabyldap, saýda jáne ınvestıtsııalyq baılanystardy belsendi damytyp kele jatyr.
Oraıly sátti paıdalana otyryp, Qasym-Jomart Toqaev kóktemgi sý tasqyny kezinde kómek kórsetkeni úshin Aleksandr Výchıch pen Serbııa halqyna alǵys aıtty. Memleket basshysy muny eki el arasyndaǵy shynaıy dostyqtyń jarqyn kórinisi retinde baǵalady.
Aleksandr Výchıch eki eldiń yntymaqtastyǵy ózara qurmet pen senim negizinde damyp kele jatqanyn atap ótti.
Serbııa Prezıdentiniń aıtýynsha, Belgrad Qazaqstanmen ekonomıkalyq baılanystardy, sonyń ishinde saýda, ınvestıtsııa sekildi basty baǵyttar boıynsha birlesken jobalardy júzege asyrý arqyly yqpaldastyqty odan ári tereńdetýge nıetti.
Aleksandr Výchıch Serbııanyń elimizben saıası dıalogty nyǵaıtýǵa beıil ekenin rastap, halyqaralyq arenadaǵy is-qımyldy úılestirýdiń mańyzyna toqtaldy.
Kezdesýde memleketter basshylary Qazaqstan men Serbııa arasyndaǵy qarym-qatynasty odan ári nyǵaıtýdyń perspektıvasyn, ekijaqty yntymaqtastyqtyń jańa baǵyttaryn talqylady. Budan bólek taraptar aımaqtyq jáne halyqaralyq kún tártibindegi ózekti máseleler boıynsha pikir almasty.
Serbııa saraıynyń aldyndaǵy alańda Memleket basshysy Qasym-Jomart Toqaevty resmı qarsy alý rásimi ótti.
Sondaı-aq Kazinform tilshisi Qazaqstan men Serbııa arasyndaǵy baılanystyń mańyzdy tustaryn saralap kórgen bolatyn.
