Memleket basshysy Serbııa Premer-mınıstrimen kezdesti
BELGRAD. KAZINFORM — Belgradqa resmı sapary aıasynda Qasym-Jomart Toqaev Serbııa Respýblıkasynyń Premer-mınıstri Mılosh Výchevıchpen kezdesý ótkizdi. Bul týraly Aqordanyń baspasóz qyzmeti málimdedi.
Áńgimelesý barysynda Memleket basshysy Prezıdent Aleksandr Výchıchpen mazmundy kelissózder júrgizgenin atap ótti.
— Serbııamen berik dostyqqa jáne ózara túsinistikke negizdelgen uzaq jylǵy seriktestigimiz ben kópjaqty baılanysymyzdy joǵary baǵalaımyz. Búgin ǵarysh, telekommýnıkatsııa, aýyl sharýashylyǵy, qorǵanys ónerkásibi, bilim, týrızm salalarynda úkimetaralyq jáne vedomstvoaralyq birqatar mańyzdy kelisimge qol qoıyldy. Túrli deńgeıdegi turaqty saıası dıalog pen ekonomıkalyq ózara yqpaldastyq bizdiń túpki múddemizge saı keledi, — dedi Qazaqstan Prezıdenti.
Memleket basshysy Qazaqstan men Serbııa úkimetterin qol jetkizgen ýaǵdalastyqtardy sapaly júzege asyrý úshin birlese áreket etýge shaqyrdy. Atap aıtqanda, ekijaqty ekonomıkalyq jáne ınvestıtsııalyq yntymaqtastyqqa tyń serpin beretin iri jobalardy naqtylaý qajet ekenin aıtty.
Bul oraıda Qasym-Jomart Toqaev Saýda-ekonomıkalyq yntymaqtastyq boıynsha úkimetaralyq komıssııa men Іskerlik keńes jumysyna zor úmit artatynyn jetkizdi.
Memleket basshysy elimizde ınvestıtsııalyq jobalardy júzege asyratyn Serbııa bıznesmenderine Qazaqstan Úkimeti tolyǵymen qoldaý kórsetýge daıyn ekenin málimdedi.
Mılosh Výchevıch Belgradtyń Qazaqstandaǵy saıası jáne áleýmettik-ekonomıkalyq reformalardy muqııat zerdelep, sondaı-aq birqatar perspektıvti baǵyt boıynsha baılanysty nyǵaıtý múmkindigin qarastyryp jatqanyna toqtaldy.
Serbııa Premer-mınıstri óz eliniń Qazaqstanmen taýar aınalymyn ulǵaıtýǵa, saýda-ekonomıka, kólik-logıstıka jáne ınvestıtsııa salalaryndaǵy ekijaqty yqpaldastyqty jandandyrýǵa nıetti ekenin rastady.
Mılosh Výchevıch «jasyl» tehnologııa, qýat kózderin almastyrýǵa qatysty máselelerdi qozǵap, osy baǵytta tájirıbe bólisýge shaqyrdy. Sonymen qatar eki elde bir-biriniń mádenı kúnderin uıymdastyrýdy jáne bıznes-forýmdardy turaqty túrde ótkizýdi usyndy.
Buǵan deıin Qazaqstan men Serbııa prezıdentteri buqaralyq aqparat quraldary ókilderine arnap brıfıng ótkizgen belgili boldy.