Memleket basshysy Saýytbek Abdrahmanovty mereıtoıymen quttyqtady
ASTANA. KAZINFORM — Qazaqstan Respýblıkasynyń Prezıdenti Qasym-Jomart Toqaev jazýshy, jýrnalıst, Memlekettik syılyqtyń ıegeri, Qazaqstannyń eńbek sińirgen qaıratkeri Saýytbek Abdrahmanovty mereıtoıymen quttyqtady.
Memleket basshysynyń quttyqtaý hatyn mereıtoı ıesine QR Mádenıet jáne aqparat mınıstri Arman Qyryqbaev tabystady.
Quttyqtaýda Prezıdent Saýytbek Abdrahmanovtyń otandyq jýrnalıstıka men ádebıetti damytýǵa, ulttyq rýhanı qundylyqtardy dáripteýge qosqan eleýli úlesin atap ótti.
— Sanaly ǵumyryńyzdy ulttyq rýhanı qundylyǵymyzdyń keń qanat jaıýyna arnap kelesiz. Qazaq baspasóziniń qara shańyraǵy — «Egemen Qazaqstan» gazetiniń bedelin arttyrýǵa, otandyq medıa salasynyń jańa beleske kóterilýine qosqan úlesińiz mol. Siz saıası-ákimshilik qyzmetterdi abyroıly atqaryp, qoǵam damýyndaǵy irgeli isterdiń bel ortasynda júrdińiz, — delingen quttyqtaýda.
Memleket basshysy mereıtoı ıesine myqty densaýlyq, otbasyna amandyq, uzaq ta jemisti ǵumyr tiledi.
